Martesat brenda të të njëjtit seks/ GJED-ja forcon të drejtat e çifteve, vendet anëtare që s’i njohin, duhet t’i regjistrojnë

Gjykata më e lartë e Bashkimit Evropian mbështeti të martën të drejtat e çifteve të të njëjtit seks, duke vendosur që vendet e BE-së që nuk lejojnë martesat e të njëjtit seks në juridiksionin e tyre, duhet të njohin martesat e lidhura në një shtet tjetër anëtar.

Gjykata vendosi në favor të një çifti polak që u martua në Gjermani. Pasi u kthyen në Poloni, kërkesa e çiftit për të transkriptuar certifikatën e martesës në regjistrin civil polak u refuzua me arsyetimin se ligji polak nuk lejon martesat e të njëjtit seks.

Bashkëshortët e kundërshtuan vendimin, duke bërë që Gjykata e Lartë Administrative Polake t’i drejtohej Gjykatës Evropiane të Drejtësisë (GJED) për udhëzime në lidhje me këtë çështje.

Gjykata Evropiane e Drejtësisë sqaroi se të drejtat e çiftit sipas ligjit të BE-së ishin shkelur kur certifikata e tyre e martesës nuk ishte njohur në Poloni, pasi çifti kishte ushtruar të drejtat e tyre si qytetarë të BE-së për t'u zhvendosur në një shtet tjetër anëtar dhe për të krijuar një jetë familjare atje.

Megjithatë, gjykata theksoi se vendimi "nuk kërkon që martesa midis personave të të njëjtit seks të përfshihet në ligjin vendas", por kërkon që të gjitha vendet e BE-së të zbatojnë një procedurë për të njohur martesat e të njëjtit seks.

“Ky rast shënon një hap të rëndësishëm drejt mbrojtjes së çifteve të të njëjtit seks në të gjithë BE-në, veçanërisht në vendet që ende nuk ofrojnë asnjë njohje dhe mbrojtje ligjore për çiftet e të njëjtit seks, si Bullgaria, Rumania, Sllovakia, Lituania dhe Polonia, në kundërshtim me detyrimet e tyre të Konventës Evropiane për të Drejtat e Njeriut, por edhe në të gjitha vendet e BE-së në të cilat çiftet e të njëjtit seks nuk kanë qasje në martesë”, tha në një koment Shoqata Ndërkombëtare e Lezbikeve, Gejve, Biseksualëve, Transeksualëve dhe Interseksualëve./ DPA News.