Zelensky dhe Merz diskutojnë përpjekjet për paqe në Ukrainë

Kancelari gjerman Friedrich Merz dhe presidenti ukrainas Volodymyr Zelensky kanë zhvilluar një bisedë telefonike, për të diskutuar përpjekjet e paqes për t'i dhënë fund luftës në Ukrainë.

Të dy udhëheqësit “diskutuan zhvillimet e fundit dhe koordinuan hapat e mëtejshëm”, tha zyra e Zelensky të martën.

Presidenti ukrainas shprehu më tej "mirënjohjen e tij për faktin se Ukraina mund të mbështetet gjithmonë në udhëheqjen dhe mbështetjen e Gjermanisë", vazhdoi deklarata.

Udhëheqësit folën gjithashtu edhe për takimin e fundit të "Koalicionit të të Vullnetshmëve", një grup mbështetësish të Ukrainës, i cili do të zhvillohet të martën.

Berlini konfirmoi telefonatën, e cila ndodhi mes negociatave intensive mbi propozimin e paqes prej 28 pikash të Presidentit të SHBA-së, Donald Trump.

Plani i fundit i paqes, i prezantuar nga Uashingtoni në fund të javës së kaluar, fillimisht dukej se përmbante shumicën e kushteve të Kremlinit për t'i dhënë fund luftës, por që atëherë është rinegociuar intensivisht nga diplomatët evropianë dhe ukrainasë.

Presidenti rus Vladimir Putin e përshkroi versionin origjinal të planit 28-pikësh si "bazën për një zgjidhje përfundimtare paqeje", por ka paralajmëruar kundër çdo zbutjeje të madhe të marrëveshjes në favor të Kievit.

Uashingtoni dhe Kievi kanë arritur një marrëveshje mbi pikat më të rëndësishme të planit të paraqitur nga Shtetet e Bashkuara për t'i dhënë fund luftës në Ukrainë, tha të martën një zyrtar i lartë ukrainas.

Sipas raportimeve të medias, një delegacion amerikan negocioi gjithashtu mbi planin me përfaqësuesit rusë në Abu Dhabi.

Ukraina është duke u mbrojtur kundër një pushtimi në shkallë të plotë rus me ndihmën e Perëndimit që nga shkurti i vitit 2022./ DPA News.