'SHBA e vetmja që po tregon iniciativë për zgjidhjen e konfliktit'/ Lavrov: Evropa ka dështuar në të gjitha frontet që nga viti 2014

Rusia nuk do të pranojë që “shkronja dhe fryma e Anchorage” të hiqet nga plani i paqes i Donald Trump për Ukrainën. Deklarata u bë nga ministri i Jashtëm rus, Sergei Lavrov, i cili u citua nga agjencia Interfax, duke iu referuar bisedimeve të zhvilluara mes presidentit amerikan dhe atij rus, Vladimir Putin, në samitin e mesgushtit në Alaska.

Lavrov deklaroi se plani fillestar prej 28 pikash, i prezantuar nga Trump, ishte në përputhje me diskutimet në Anchorage dhe mbetet dokumenti i vetëm që Moska ka marrë deri tani – madje, sipas tij, edhe ai është dorëzuar në mënyrë jozyrtare. Rusia pret aktualisht “versionin ndërmjetës” të draftit, të cilin SHBA po e koordinon me aleatët evropianë dhe me Ukrainën.

“Evropa dështoi që nga viti 2014”

Shefi i diplomacisë ruse u shpreh kritik ndaj vendeve evropiane, duke theksuar se ato “e humbën mundësinë për të luajtur një rol paqësor në konfliktin ukrainas” dhe se “kanë dështuar në të gjitha frontet” që prej vitit 2014. Komenti erdhi në përgjigje të deklaratave të udhëheqësve evropianë se zgjidhja e konfliktit nuk mund të arrihet pa pjesëmarrjen e tyre.

Lavrov vlerësoi qëndrimin e Uashingtonit, duke e cilësuar SHBA-në si të vetmen në Perëndim që sipas tij “po tregon iniciativë për gjetjen e rrugëve të një marrëveshjeje”, në kontrast me Londrën, Brukselin, Parisin dhe Berlinin.

Publikimet “e qëllimshme” dhe përpjekjet për të minuar procesin

Lavrov nënvizoi se dokumentet e publikuara deri tani për planin e paqes “nuk janë zyrtare” dhe se publikimi i tyre ka pasur për qëllim nxitjen e trazirave politike. Sipas tij, ata që përhapin këto materiale synojnë të “minojnë përpjekjet e Donald Trump” dhe të shtrembërojnë perceptimin e planit.

Ministri konfirmoi gjithashtu se ekzistojnë kanale aktive komunikimi mes Moskës dhe Uashingtonit, dhe se Rusia po pret draftin që SHBA e konsideron aktualisht të përkohshëm. “Kur ta marrim, do të shohim se çfarë përmban,” deklaroi ai.

Konteksti i bisedimeve dhe pozicioni rus

Lavrov paralajmëroi se çdo përpjekje për të hequr elementet kryesore të asaj që ai e quajti “shkronja dhe fryma e Anchorage” do të krijonte një “situatë thelbësisht të ndryshme”, duke lënë të kuptohet se Moska nuk do ta pranonte një plan që largon parimet e diskutuara më parë.

Ndërkohë, zëdhënësi i Kremlinit, Dmitry Peskov, deklaroi se Moska ende nuk ka marrë një version të përditësuar të planit amerikan për Ukrainën dhe se nuk ka komente lidhur me raportimet për bisedimet mes Sekretarit amerikan të Mbrojtjes, Dan Driscoll, dhe delegacionit rus në Abu Dhabi.