BILD

Kancelari gjerman, Friedrich Merz, anuloi papritur takimet të premten. Sipas asaj që BILD mësoi nga Zyra e Kancelarit, kancelari ka kërkuar nga ministri i tij i Zyrës së Kancelarit, Thorsten Frei, të marrë pjesë në një takim në vend të tij për shkak të “bisedave të brendshme dhe telefonatave të planifikuara lidhur me situatën në Ukrainë”.

Siç u tha më tej, për telefonatat do të raportohet “vetëm me dakordësinë e partnerëve të bisedave”. Sipas informacionit të BILD, Merz do të zhvillojë, ndër të tjera, biseda me presidentin amerikan, Donald Trump, dhe presidentin ukrainas, Volodymyr Zelensky.

Për çfarë bëhet fjalë? Sigurisht për planin 28-pikësh të Trump për Ukrainën, i cili kërkon nga vendi i sulmuar nga Rusia të bëjë kompromise të ashpra – por sipas idesë së presidentit amerikan, ky plan do të sigurojë paqen.

Një pjesë e planit, që ka alarmuar politikanët në Europë dhe Ukrainë, është se Ukraina duhet të dorëzojë territore të kontestuara – edhe ato që Rusia ende nuk i ka pushtuar. Gjithashtu, ushtria ukrainase duhet të përgjysmohet dhe armët kryesore të marra nga Perëndimi duhet të dorëzohen. SHBA-të do të zvogëlojnë gjithashtu mbështetjen e tyre ushtarake për vendin e sulmuar.

Si shkëmbim, Rusia, e cila ka sulmuar të gjithë Ukrainën gjatë vitit 2022, do të ndalonte sulmet.

Pas zbulimit të planit, ekspertët shprehën shqetësimin se Ukraina mund të anashkalohet dhe një pjesë e madhe e kërkesave ruse do të plotësoheshin.

Eksperti i sigurisë, Nico Lange, nuk sheh një plan paqeje, por një “përpjekje për të hequr Ukrainën nga rruga”. Lange i tha BILD: “SHBA-të përpiqen herë pas here të bëjnë marrëveshje në dëm të Ukrainës dhe të Europës, për të normalizuar marrëdhëniet me Rusinë”. Një “zgjidhje e vërtetë paqeje” do të ketë vetëm “nëse pozicioni i Ukrainës dhe roli i Europës do të përfshihen”.

BE-ja insiston pikërisht në këtë përfshirje: “Që një plan të funksionojë, padyshim që ukrainasit dhe europianët duhet të jenë të përfshirë,” thotë përfaqësuesja e lartë e BE-së për politikë të jashtme, Kaja Kallas, në Bruksel. Edhe ministri i jashtëm i Polonisë, Radoslaw Sikorski, kërkon që Europa të konsultohet për përpjekjet për paqe. “Shpresoj që kufizime nuk t’i vendosen viktimës për aftësinë e saj për t’u mbrojtur, por agresorit,” thotë ai.