Një formë e egër e poliomelitit u gjet në ujërat e zeza të Hamburgut

Autoritetet gjermane identifikuan të enjten qytetin verior të Hamburgut, si vendndodhjen ku ishte gjetur një mostër e ujërave të zeza që përmbante formën e egër të virusit të poliomelitit, duke thënë se ishte ngritur një grup pune dhe do të merreshin më shumë mostra.

Organi kryesor i shëndetit publik i vendit, Instituti Robert Koch, ose RKI, i tha Reuters të mërkurën se një test i ujërave të zeza në një vendndodhje të paspecifikuar gjermane rezultoi pozitiv për virusin e poliomelitit, në një pengesë për përpjekjet për të hequr qafe sëmundjen vdekjeprurëse në botë.

"Zbulimi i poliovirusit të egër në një mostër të ujërave të zeza, tregon se mbikëqyrja po funksionon. Deri më sot nuk janë raportuar raste klinike të poliomelitit në RKI", tha të enjten ministria gjermane e shëndetësisë.

Gjetjet erdhën më shumë se 30 vjet, pasi rastet e fundit të infeksioneve të virusit të poliomelitit të egër tek njerëzit u regjistruan në Gjermani dhe shënuan zbulimin e parë të virusit të egër nga marrja e mostrave mjedisore në vend, që nga fillimi i këtij lloj monitorimi rutinë në vitin 2021, dhe i pari në Evropë që nga viti 2010, sipas Organizatës Botërore të Shëndetësisë.

MË SHUMË MOSTRA PO MERREN

Autoritetet shëndetësore në qytetin e Hamburgut, i cili është gjithashtu një nga 16 shtetet rajonale të Gjermanisë, thanë në një deklaratë se kishin mbledhur një grup pune ekspertësh për kontrollin e infeksioneve dhe do të merrnin më shumë mostra, duke u koordinuar ngushtë me RKI-në. Ministria e shëndetësisë tha se po informohej për zhvillimet dhe theksoi se vaksinimi, ishte çelësi për t'u mbrojtur nga poliomeliti.

Hamburgu shtoi se mostra pozitive u mor në javën e 6 tetorit, duke riafirmuar vërejtjet e mëparshme të RKI-së se rreziku për publikun e gjerë ishte shumë i ulët, për shkak të shkallës së lartë të vaksinimit dhe se nuk ishin raportuar infeksione.

"Zbulimi aktual sugjeron që viruset janë nxjerrë nga të paktën një person, që ndodhej në Hamburg në kohën kur u morën mostrat e ujërave të zeza", shtoi RKI të enjten, duke shtuar se ngjarja ishte e pazakontë, por jo krejtësisht e papritur.

DY FORMA TË POLIOMELITETI

Poliomieliti, është një infeksion viral që mund të vrasë ose të shkaktojë paralizë, por që mund të parandalohet me anë të vaksinimit.

Ekzistojnë dy forma të poliomelitit që qarkullojnë në nivel global. Poliomeliti i egër është më i rrallë dhe tani gjendet vetëm në Afganistan dhe Pakistan. Lloji i zbuluar në Gjermani është i lidhur me llojin që qarkullon në Afganistan. Herë pas here zbulohet edhe diku tjetër: për shembull, pati shpërthime në Malavi dhe Mozambik në vitin 2022.

Forma tjetër, poliomeliti i nxjerrë nga vaksina, qarkullon në më shumë vende dhe rrjedh nga raste të rralla ku viruset e gjalla të dobësuara të përdorura në disa vende për imunizim mutojnë dhe përhapen. Gjithashtu është zbuluar më vonë sesa poliomeliti i egër, në vendet që përndryshe janë pa poliomelit: disa vende evropiane e kanë gjetur atë në marrjen e mostrave rutinë që nga viti 2022 , përfshirë Gjermaninë, Spanjën dhe Britaninë.

ZBULIMET E POLIOMELITIT TREGOJNË NEVOJËN PËR VAKSINIME

Beate Kampmann, drejtoreshë shkencore në Qendrën për Shëndetin Global në spitalin më të madh universitar të Gjermanisë, Charité në Berlin, tha se zbulimi nënvizoi rëndësinë e vaksinimit.

“Poliomeliti kudo do të thotë një rrezik potencial i poliomelitit kudo”, i tha ajo Reuters, duke shtuar se financimi i qëndrueshëm për zhdukjen e poliomelitit ishte jetik./ Reuters.