Pasi triumfoi në garën për drejtues të Qarkut Nassau, Blakeman i mbështetur nga Trump synon të kandidojë për Guvernator të New York-ut

Kreu i Qarkut Nassau, Bruce Blakeman deklaroi se do të shqyrtojë mundësinë për të kandiduar për Guvernator të New York, vetëm një ditë pas fitores së tij bindëse në rizgjedhjen si pjesë e “valës së kuqe” republikane në Long Island.

“Do të takohem me një grup drejtuesish në mbarë shtetin gjatë javëve të ardhshme për të diskutuar nëse duhet të kandidoj për Guvernator”, tha republikani për gazetën The Post të mërkurën.

Blakeman më parë kishte “flirtuar” me idenë e kandidimit për Guvernator, por më pas ishte përqendruar tek rizgjedhja si Drejtues i Qarkut.

Ndërkohë, kongresmenia republikane nga pjesa veriore e shtetit, Elise Stefanik, ka ngritur tashmë një ekip fushate për t’u përballur me guvernatoren demokrate në detyrë, Kathy Hochul, në zgjedhjet e vitit 2026.

Hyrja e pritur e Stefanik në garë dukej se kishte pastruar fushën nga rivalët e mundshëm, por Blakeman tha se po e konsideron seriozisht mundësinë e kandidimit.

“Nëse ndjej që ka mbështetje, do ta marr në konsideratë”, tha Blakeman. “Rruga për të mposhtur Guvernatoren Hochul nis në Long Island”, vijoi ai.

Blakeman shtoi se Hochul është “jashtëzakonisht e papëlqyer” në ishull dhe politikisht më e dobët se sa ishte në vitin 2022.

“Lidhja e saj me Zohran Mamdani-n do ta dëmtojë”, tha Blakeman, duke iu referuar mbështetjes së Hochul-it për kryetarin demokrat socialist të zgjedhur të qytetit fqinj të Nju Jorkut.

“E di që do të fitoj nëse vendos të kandidoj,” shtoi Blakeman.

Blakeman tha gjithashtu se kishte marrë një telefonatë urimi nga ish-presidenti Donald Trump të martën në mbrëmje, i cili ishte shumë i kënaqur që ai dhe republikanë të tjerë fituan në garën e  rizgjedhjes në Qarkun Nassau.

Zëdhënësi i Partisë Demokratike të shtetit, Addison Dick, komentoi për ambiciet e Blakeman-it për Guvernator: “Fushata e Elise Stefanik po dështon para se të nisë”.