Rusia i kërkon administratës Trump të sqarojë sinjalet 'kontradiktore' mbi testet bërthamore

Rusia i kërkoi Shteteve të Bashkuara të premten të sqarojnë, ato që i quajti sinjale kontradiktore në lidhje me një rifillim të testimeve bërthamore, duke thënë se një hap i tillë do të shkaktonte reagime nga Rusia dhe vendet e tjera.

Presidenti Donald Trump javën e kaluar urdhëroi ushtrinë amerikane që të rifillojë menjëherë procesin e testimit të armëve bërthamore. Por ai nuk e sqaroi nëse nënkuptonte testimin e raketave të afta për të mbajtur armë bërthamore apo rifillimin e testeve që përfshijnë shpërthime bërthamore - diçka që as SHBA-ja dhe as Rusia nuk e kanë bërë për më shumë se tre dekada.

“Nëse është kjo e fundit, atëherë kjo do të krijojë dinamikë negative dhe do të shkaktojë hapa nga shtetet e tjera, përfshirë Rusinë, në përgjigje”, u tha gazetarëve zëdhënësja e Ministrisë së Jashtme ruse, Maria Zakharova.

"Për momentin, vërejmë se sinjalet që vijnë nga Uashingtoni, të cilat po shkaktojnë shqetësim të justifikuar në të gjitha cepat e botës, mbeten kontradiktore dhe, sigurisht, gjendja e vërtetë duhet të sqarohet."

Duke përmendur mungesën e qartësisë rreth planeve të SHBA-së, Presidenti Vladimir Putin të mërkurën udhëzoi zyrtarët e lartë të përgatisin propozime, që Rusia të kryejë provën e saj të mundshme bërthamore në përgjigje të çdo prove të SHBA-së.

Analistët e sigurisë thonë se një rifillim i testimeve nga cilado prej fuqive bërthamore të botës do të ishte një hap destabilizues në një kohë tensioni të akut gjeopolitik, veçanërisht për shkak të luftës në Ukrainë, dhe ka të ngjarë të nxisë vendet e tjera të ndjekin shembullin.

Rusia dhe SHBA-të zotërojnë arsenalet bërthamore më të mëdha në botë.

Traktati i fundit i mbetur midis tyre që kufizon numrin e kokave bërthamore strategjike nga të dyja palët do të skadojë pas tre muajsh, duke nxitur potencialisht një garë armatimesh që është tashmë në zhvillim e sipër.

Putini ka propozuar që të dyja palët të vazhdojnë të respektojnë kufijtë e traktatit për një vit tjetër, por Trump ende nuk i është përgjigjur zyrtarisht idesë./ Reuters.