Trump - Mamdanit: Uli tonet, komunizmi nuk ka funksionuar kurrë

Presidenti Donald Trump kritikoi fjalimin e "zemëruar" të fitores të kryetarit të zgjedhur të Nju Jorkut, Zohran Mamdani, duke paralajmëruar se komunizmi "nuk ka funksionuar kurrë askund."

Trump reagoi ndaj rezultateve të zgjedhjeve të nëntorit në emisionin "Special Report with Bret Baier."

Republikanët Jack Ciattarelli dhe Winsome Earle-Sears humbën garat për guvernator ndaj demokrateve Mikie Sherrill dhe Abigail Spanberger në Nju Xhersi dhe Virxhinia. Në Nju Jork, socialdemokrati Zohran Mamdani u zgjodh kryetar bashkie.

Presidenti tha se kishte pritur që republikanët të bënin më mirë në Nju Xhersi, por nuk u habit nga rezultatet në Virxhinia dhe Nju Jork.

"Mendoja se Nju Xhersi do të shkonte pak më mirë," tha Trump. "Situata me Cuomo-n, ai kishte shumë gjëra kundër vetes. Curtis Sliwa u përpoq fort, por Mamdani kishte shanse."

Trump tha se do të donte që Mamdani ta "bënte mirë punën", sepse ai e do Nju Jorkun, por e paralajmëroi që të ishte "i respektueshëm" ndaj Uashingtonit, duke kritikuar qëndrimin e tij pro komunizmit.

"Prej mijëra vitesh komunizmi nuk ka funksionuar," tha Trump. "Koncepti i komunizmit nuk ka funksionuar. S'besoj se do të funksionojë tani... Nuk ka funksionuar kurrë."

Presidenti shtoi se sondazhet tregonin se mbyllja e qeverisë kishte ndikuar shumë në rezultatet e zgjedhjeve, duke akuzuar demokratët "e radikalizuar" për krijimin e një situate që "nuk ka ndodhur kurrë më parë" gjatë mbylljes më të gjatë të qeverisë në historinë e SHBA-së.

"Demokratët gjithmonë e kanë shtyrë afatin në mbylljet e mëparshme," tha ai. "Është shumë e lehtë ta shtysh, e bëjnë gjithmonë. Ndonjëherë e shtyjnë katër ose pesë herë. Por tani janë bërë radikalë, në kuptimin e plotë të fjalës. Duhet ta shtyjnë automatikisht afatin, dhe sapo ta bëjnë, ne do të arrijmë një marrëveshje."

Trump tha se do të "donte" të punonte me demokratët për të përmirësuar sistemin shëndetësor dhe se dëshiron të "ecë përpara."

"Duhet të punojmë bashkë për kujdesin shëndetësor, sepse Obamacare ka qenë një dështim. Do të ketë rritje të madhe të kostos, është shumë i shtrenjtë dhe jo cilësor. Do të doja shumë të punonim për ta rregulluar."

Ai shtoi gjithashtu se heqja e rregullit të obstruksionizmit në Kongres mund të sillte përfitime.

"Nëse do ta hiqnim obstruksionizmin, do të miratonim shumë gjëra të mira, të thjeshta e kuptimplota dhe do të ishte e vështirë të na mposhtnin," tha Trump. / Fox News - Syri.net