Flukset e migracionit drejt ekonomive të pasura janë ngadalësuar ndjeshëm, sipas një raporti të ri të OECD-së të publikuar të hënën. Pas tre vitesh rritjeje të fortë, migrimi i përhershëm drejt vendeve anëtare të OECD-së ra me 4% në vitin 2024, ndërsa migrimi i lidhur me punën u ul me 21%.

Sekretari i përgjithshëm i OECD-së, Mathias Cormann, tha se migracioni ka qenë thelbësor për të adresuar mungesat e fuqisë punëtore dhe për të mbështetur qëndrueshmërinë ekonomike në vendet pritëse. Ai theksoi nevojën për politika më efektive për të menaxhuar presionet mbi shërbimet publike dhe për të lehtësuar integrimin e migrantëve në tregun e punës.

“Hendeku i madh i të ardhurave nga puna mes emigrantëve dhe punëtorëve vendas tregon rëndësinë e njohjes së kualifikimeve të huaja dhe përmirësimit të politikave të gjuhës, punësimit dhe zhvillimit të aftësive,” – shtoi Cormann.

Ndërkohë, raporti tregon se migrimi familjar dhe humanitar është rritur, duke shtuar presion mbi strehimin, arsimin dhe shërbimet sociale, edhe në vendet me përvojë të gjatë në menaxhimin e flukseve migratore.

Në total, 6.2 milionë persona u vendosën në shtetet anëtare të OECD-së në vitin 2024, një shifër 15% më e lartë se para pandemisë.

OECD vëren se rënia e migrimit për punë lidhet me kushtet më të buta të tregut të punës dhe politikat më të rrepta të vizave, sidomos në vende si Mbretëria e Bashkuar. Në disa shtete të BE-së, përfshirë Gjermaninë dhe Holandën, migrimi i fuqisë punëtore ka rënë nën nivelet e para pandemisë.

Megjithatë, shumë emigrantë vazhdojnë të performojnë mirë në tregun e punës, dhe në disa vende, shkalla e punësimit të tyre është më e lartë se ajo e popullsisë vendase.

OECD paralajmëron se pa një rritje të migracionit, fuqia punëtore e vendeve anëtare mund të tkurret me rreth 8% deri në vitin 2060, duke ngadalësuar ndjeshëm rritjen ekonomike mesatare.