Nga Sophia Compton, FOX NEWS

Një gjykatëse e Gjykatës së Lartë të Arizonës ka dhënë dorëheqjen pasi dyshohet se është kapur duke urinuar në publik, vetëm disa hapa larg gjykatës ku punonte.

Policia e Prescott-it reagoi rreth orës 1:30 të mëngjesit më 4 tetor, pasi dëshmitarët raportuan një grua që po lehtësohej pranë rrugëve Montezuma dhe Gurley, në të njëjtin bllok ku ndodhet ‘Courthouse Plaza’ ku ajo punonte.

Video nga kamera trupore tregon gjykatësen e qarkut Yavapai, Kristyne Schaaf-Olson, duke ngritur pantallonat përpara se të ulej me shpejtësi në një stol. Polici i afrohet dhe thotë: “Kjo është e neveritshme”.

Në video, Schaaf-Olson duket se përpiqet të shqiptojë emrin e saj, ndërsa polici përpiqet ta identifikojë. Pak më vonë, burri i saj, Jason Olson, menaxher i parqeve dhe rekreacionit për qytetin e Chino Valley, afrohet në vendngjarje dhe përpiqet të tërheqë gruan larg oficerëve, duke refuzuar urdhrat për të bërë një hap pas.

Kur polici pyetet se pse po testohej Schaaf-Olson, përgjigjja ishte: “Sepse sapo e pashë duke vjellë dhe duke urinuar, duke u ekspozuar para disa personave”. Jason insiston: “Jo. Nuk ishte ajo”.

Ndërsa Jason vazhdon të kundërshtojë urdhrat, polici i hedh prangat, kurse Jason proteston: “Unë nuk po bëj asgjë!” 

Schaaf-Olson u padit për urinim ose jashtëqitje në publik – një shkelje e lehtë penale. Jason Olson u padit për kundërshtim ndaj arrestimit, ndërhyrje në hetimin e vendit të krimit dhe pengim të operacioneve qeveritare.

Video tregon edhe momentin kur Schaaf-Olson prezantohet si gjykatëse: “Në rregull. Dua t’ju them, emri im është gjykatëse Kristyne Olson”. Ajo shihet gjithashtu duke u munduar të nënshkruajë gjobën. Një oficer i thotë: “Jo, këtu në ekran. Në ekran”.

Disa ditë më vonë, Gjykata e Lartë e Qarkut Yavapai konfirmoi dorëheqjen e saj, e cila hyn në fuqi më 31 tetor. Schaaf-Olson tha në një deklaratë më 6 tetor: “Dorëheqja ime vjen pas një vlerësimi të kujdesshëm të rrethanave aktuale fizike, mjekësore dhe familjare. Komuniteti i Yavapai-t meriton dhe ka gjykatës që janë të palëkundur në përkushtimin e tyre për të shërbyer. Duke marrë parasysh ngjarjet aktuale në jetën time, besoj se do të ishte e vështirë të nderoja këtë përkushtim. Prandaj kam vendosur të jap dorëheqjen”.

Konferenca përpara gjykimit e Schaaf-Olson-it është caktuar për më 16 dhjetor, ndërsa ajo e Olson-it më 18 nëntor. Departamenti i Policisë së Prescott-it nuk ka dhënë koment menjëherë për Fox News Digital.