Ministri i Jashtëm Abbas Araghchi thotë se bota pa vetëm një pjesë të vogël të fuqisë së Iranit gjatë luftës 12-ditore me Izraelin në qershor, duke theksuar se Republika Islamike tani është edhe më e përgatitur për çdo konflikt të ri të mundshëm.

Araghchi i bëri këto komente në një intervistë ekskluzive me Al Jazeera Arabic, të publikuar të shtunën. Ai iu përgjigj pyetjeve mbi çështje të ndryshme, duke përfshirë programin bërthamor të Iranit dhe luftën 12-ditore në të cilën SHBA-të hynë duke bombarduar tre lokacione bërthamore iraniane më 22 qershor.

“Mendoj se e gjithë bota dëshmoi një pjesë të fuqisë sonë gjatë luftës 12-ditore. Pavarësisht sulmeve të papritura që Izraeli kreu kundër nesh në ditën e parë, ne ishim në gjendje të reagonim menjëherë. Në ditët e para, zoti Trump shkroi në Twitter se ne duhet të dorëzoheshim pa kushte, por në ditën e 12-të, ishin ata që propozuan një armëpushim pa kushte”, tha diplomati i lartë, duke iu referuar armëpushimit të shpallur nga Presidenti i SHBA-së Donald Trump.

“Kjo tregon se Irani është shumë më i fortë nga sa e kishin imagjinuar. Në veçanti, uniteti kombëtar dhe mbështetja e palëkundur e popullit për qeverinë erdhën si një surprizë e madhe për botën. Ne nxorëm shumë mësime nga ajo luftë në fushat politike, ushtarake dhe ekonomike, dhe mund të them se nëse ndodh një luftë tjetër, ne do të jemi edhe më të përgatitur”, shtoi Araghchi./ IRNA.