Maldivet janë bërë vendi i parë në botë që ndalon pirjen e duhanit për breza të tërë, duke i ndaluar personat e lindur pas datës 1 janar 2007 të blejnë, përdorin apo të kenë qasje në produkte duhani.

Vendimi u shpall nga presidenti Mohamed Muizu dhe hyri në fuqi më 1 nëntor, me synimin për të mbrojtur shëndetin publik dhe për të krijuar një “brez pa duhan”, sipas Ministrisë së Shëndetësisë së vendit. Ligji i ri ndalon çdo formë përdorimi apo tregtimi të duhanit për këtë kategori moshe, dhe zbatimi i tij do të jetë i detyrueshëm në të gjithë territorin e Maldiveve.

Autoritetet theksojnë se ndalimi përfshin të gjitha llojet e produkteve të duhanit, ndërsa shitësit janë të detyruar të verifikojnë moshën e klientëve përpara çdo shitjeje. Rregulli zbatohet edhe për turistët që vizitojnë kombin ishullor, i përbërë nga 1,191 ishuj koralorë që shtrihen për rreth 800 kilometra përgjatë ekuatorit dhe që njihen për turizmin e tyre luksoz.

Në të njëjtën kohë, mbetet në fuqi ndalimi i plotë i importit, shitjes, shpërndarjes, posedimit dhe përdorimit të cigareve elektronike dhe produkteve të avullimit për të gjitha grupmoshat.

Sipas ligjit, shitja e produkteve të duhanit te të miturit dënohet me një gjobë prej 50,000 rufijaa (rreth 3,200 dollarë), ndërsa përdorimi i pajisjeve të duhanit ndëshkohet me 5,000 rufijaa (rreth 320 dollarë).

Ky hap e pozicionon Republikën e Maldiveve si pionierin global në politikat për një shoqëri pa duhan./REFORMA