Luftë hibride apo luftë e shenjtë: A ndajnë ISIS dhe Rusia të njëjtin manual?

ISIS dhe Rusia, ndonëse ndahen nga ideologji të ndryshme, përdorin taktika të ngjashme për të ndikuar dhe destabilizuar shoqëritë moderne — propagandë, dezinformim dhe rekrutim të grupeve vulnerabël. Ekspertët paralajmërojnë se Moska po zhvillon një “luftë hibride” kundër Perëndimit, duke përdorur civilë të zakonshëm si “agjentë të nivelit të ulët” për akte të vogla sabotimi e spiunazhi, ndërsa ISIS, në kulmin e tij, përdori internetin për të radikalizuar dhe frymëzuar dhunë.

Sipas Euronews, aktet e orkestruara nga Rusia përfshijnë zjarrvënie, filmim të infrastrukturës kritike apo dërgim pakosh me eksplozivë — gjithçka për të krijuar pasiguri dhe kaos. Kancelari gjerman Friedrich Merz akuzoi së fundmi Moskën për zhvillimin e një lufte hibride që ndërthur taktika ushtarake, ekonomike dhe kibernetike. Eksperti i ICCT, Kacper Rękawek, tha se Rusia po rekruton individë “moralisht të dyshimtë”, të lehtë për t’u manipuluar, duke përdorur kriminelët si përfaqësues — një strategji që kujton rekrutimin e ISIS-it në Evropë midis viteve 2013 dhe 2019.

Paralelet janë të shumta: ndërsa ISIS mobilizoi myslimanë të rinj e të margjinalizuar përmes xhamive si Fussilet 33 në Berlin, Rusia po përdor kanale ideologjike dhe fetare, përfshirë komunitetet ortodokse ruse në Evropë, për të përhapur narrativën e Kremlinit. Kisha Ortodokse Ruse, e lidhur ngushtë me Patriarkun Kirill I, e ka quajtur luftën në Ukrainë një “luftë të shenjtë” kundër Perëndimit dhe globalizmit.

Sipas Dr. Hans Jakob Schindler nga Projekti Kundër Ekstremizmit, “agjentët e nivelit të ulët” shpesh tërhiqen nga kombinimi i varfërisë dhe ideologjisë. Rusia i shfrytëzon këta individë për qëllime gjeopolitike, ndërsa propaganda fetare përdoret për të justifikuar agresionin. Një klerik ortodoks i cituar nga Euronews tha se, ndonëse kisha zyrtarisht shmang debatin politik, ndikimi i saj ideologjik mbetet i fortë dhe shpesh i padiskutueshëm.

Ekspertët theksojnë se edhe ISIS, edhe Rusia mbështeten te frika dhe manipulimi i opinionit publik për të krijuar ndarje sociale dhe pasiguri. Por ndërsa Perëndimi e ka dënuar njëzëri terrorizmin islamik, reagimi ndaj agresionit rus mbetet më i paqartë. “Me ISIS-in të gjithë ishim dakord se ishte i lig; me Rusinë, reagimi është shumë më kompleks”, shpjegon Rękawek.

Dr. Christopher Nehring nga Instituti i Inteligjencës Kibernetike paralajmëron se sulmet hibride synojnë psikikën e shoqërisë. Ai thekson se qëllimi i Rusisë nuk është vetëm dëmi fizik, por krijimi i pasigurisë dhe frikës kolektive. “Incidentet e vogla nuk duhet të na trembin, por të na nxisin të ndërtojmë rezistencë psikologjike”, tha ai.

Në një botë ku propaganda dixhitale dhe terrori psikologjik janë armët e reja të luftës, ngjashmëritë mes ISIS-it dhe Rusisë tregojnë se frontet e konfliktit janë zhvendosur — nga fushëbeteja, drejt ndërgjegjes kolektive të njerëzimit./ Euronews - Syri.Net