Uragani ‘Melissa’ godet Kubën pasi shkatërroi Xhamajkën, shpallet ‘zonë katastrofe’

Uragani shkatërrimtar Melissa ka përfshirë Karaibet, duke goditur Kubën pas një kalimi të dhunshëm mbi Xhamajkë, të cilën e ka lënë pas si një ‘zonë katastrofe’. Erërat e fuqishme dhe reshjet ekstreme të shiut kanë shkaktuar dëme masive në infrastrukturë dhe mijëra banesa.

Efektet e stuhisë kolosale janë ndier në të gjithë rajonin, madje edhe në vendet që nuk ndodheshin drejtpërdrejt në rrugën e saj. Në Haitin fqinj, autoritetet konfirmuan vdekjen e 25 personave për shkak të përmbytjeve të rënda, raportojnë mediat e huaja.

Sipas ekspertëve, Melissa është cikloni tropikal më intensiv që ka goditur Xhamajkën në gati dy shekuj dhe një ndër uraganet më të fuqishëm të regjistruar në Atlantik që nga fillimi i mbajtjes së të dhënave. Shkencëtarët e klimës theksojnë se ngrohja globale e shkaktuar nga njeriu po kontribuon në intensifikimin e shpejtë të stuhive të tilla.

Në Xhamajkë, qindra mijëra banorë u zgjuan të mërkurën pa energji elektrike, ndërsa lagje të tëra u përmbytën. Kryeministri Andrew Holness shpalli vendin ‘zonë fatkeqësie kombëtare’, duke i dhënë autoriteteve kompetenca shtesë për evakuime të detyrueshme dhe kontroll të çmimeve në zonat e prekura.

‘Ky është një nga përvojat më të këqija që vendi ynë ka kaluar ndonjëherë,’ deklaroi ministri i qeverisjes vendore, Desmond McKenzie.

Raportime nga terreni tregojnë dëme masive në pjesën perëndimore të ishullit, ku uragani i kategorisë 5 lëvizi me një ritëm të ngadaltë, duke shkulur çati, përmbysur automjete dhe shkatërruar rrugë të tëra.

Aktualisht, Melissa po kalon mbi Kubë, me autoritetet që paralajmërojnë për reshje ekstreme, përmbytje të mundshme dhe rrezik të lartë për rrëshqitje dheu.