Amazon shkurton 14 mijë vende pune, shkak përdorimi i 'IA' në proceset e punës

Amazon ka konfirmuar se planifikon të shkurtojë mijëra vende pune, duke thënë se ka nevojë të jetë “më e organizuar dhe më efikase” për të përfituar nga mundësitë që ofron inteligjenca artificiale (AI).

Gjiganti teknologjik njoftoi të martën se do të reduktojë fuqinë e tij punëtore globale në nivel korporate me “rreth 14,000 pozicione”, shkruan BBC

Raportimet e mëhershme kishin sugjeruar se kompania mund të planifikonte shkurtimin e deri në 30,000 punonjësve.

Beth Galetti, një nënkryetare e lartë në Amazon, shkroi në një letër drejtuar stafit se ky hap do ta bënte kompaninë “edhe më të fortë” duke zhvendosur burimet “për të siguruar që po investojmë në nismat tona më të rëndësishme dhe në ato që kanë më shumë rëndësi për nevojat aktuale dhe të ardhshme të klientëve tanë”.

Lajmi shënon një ndryshim rrënjësor nga numri i madh i punësimeve gjatë pandemisë Covid-19, kur kërkesa për blerje online e shtyu gjigantin me seli në Siatëll të zgjeronte me shpejtësi fuqinë punëtore.

Edhe pse shkurtimet e vendeve të punës përfaqësojnë një pjesë relativisht të vogël të të gjithë fuqisë punëtore globale të ”Amazon” – afërsisht 1,55 milionë – ndikimi do të jetë i rëndësishëm për afërsisht 10% të 350 000 punonjësve të saj të korporatave.

”Ky është shkurtimi më i madh i vendeve të punës i ndërmarrë ndonjëherë nga kompania”, sipas CNBC.

Lëvizja e ”Amazon” pasqyron vështirësitë që shumë kompani të teknologjisë dhe tregtisë elektronike po hasin në ruajtjen e ritmeve të rritjes të arritura gjatë pandemisë.

Me normalizimin e kërkesës dhe presionet e marzhit, kompanitë po detyrohen të rivlerësojnë strategjitë e tyre të zgjerimit dhe të kërkojnë mënyra të reja për të përmirësuar efikasitetin.

Vendimi për të shkurtuar vendet e punës vjen vetëm disa muaj pas komenteve të CEO-s, i cili tashmë i kishte paralajmëruar punonjësit për rrezikun e zëvendësimit nga inteligjenca artificiale.

Kompania tani po përqendrohet në uljen e kostove dhe përmirësimin e strukturës së saj korporative, pasi u përball me një rritje të përkohshme të kërkesës që çoi në një fushatë të paprecedentë punësimi