Evropë/ Vdekjet në det mbeten të larta pavarësisht numrit më të ulët të emigrantëve të parregullt drejt BE-së

Hyrjet e parregullta në Bashkimin Evropian kanë shënuar një rënie të ndjeshme gjatë nëntë muajve të parë të vitit 2025. Sipas të dhënave të agjencisë kufitare të BE-së, Frontex, janë regjistruar 133,400 kalime të parregullta – 22% më pak krahasuar me të njëjtën periudhë të vitit të kaluar. Ndër kombësitë më të raportuara renditen Bangladeshi, Egjipti dhe Afganistani.

Rënia më e madhe është regjistruar në rrugën perëndimore afrikane, ku kalimet e parregullta ranë me 58%, ndërsa në Ballkanin Perëndimor dhe në rrugën lindore tokësore u shënua një ulje përkatësisht prej 47% dhe 36%. Ekspertët theksojnë se faktorë si pasiguria politike, bashkëpunimi në kontrollin e kufijve dhe kushtet e motit kanë ndikuar në ngadalësimin e përgjithshëm të flukseve migratore.

“Rënia e përgjithshme mund të lidhet me ndërprerjen e konflikteve, pasigurinë politike dhe përpjekjet e shtuara për kontrollin e kufijve”, tha Helena Hahn, analiste në Qendrën Evropiane të Politikave (EPC). Megjithatë, ajo paralajmëroi se shifrat nuk nënkuptojnë më pak njerëz në lëvizje, pasi numri i migrantëve ndërkombëtarë dhe i të zhvendosurve me forcë vijon të rritet.

Ndërkohë, Mesdheu qendror mbetet rruga më aktive dhe më e rrezikshme, duke përbërë gati 40% të të gjitha hyrjeve të parregullta në BE. Libia është pika kryesore e nisjes në këtë itinerar, me një rritje prej 50% të nisjeve krahasuar me vitin 2024. Shumica e migrantëve që ndjekin këtë rrugë vijnë nga Bangladeshi, Eritrea dhe Egjipti.

Në rrugën perëndimore të Mesdheut, Frontex raportoi një rritje prej 28% të kalimeve, ku vetëm në shtator mbërritjet u rritën me më shumë se gjysmën. Algjeria përbën pothuajse 75% të zbulimeve në këtë itinerar, pasi përpjekjet parandaluese të Marokut kanë zhvendosur aktivitetin kontrabandist në territorin algjerian.

Pavarësisht rënies së përgjithshme të numrave, kostot njerëzore mbeten dramatike. Sipas Organizatës Ndërkombëtare për Migracionin (IOM), 1,328 migrantë kanë humbur jetën ose janë zhdukur në vitin 2025, shumica gjatë kalimeve në Mesdhe. Vetëm në rrugën qendrore janë regjistruar 895 viktima, me mbytjen si shkakun kryesor të vdekjes.

“Pas këtyre migrantëve të zhdukur qëndrojnë familje dhe komunitete që kërkojnë përgjigje dhe përballen me mungesën e tyre,” thuhet në raportin e IOM-it për Familjet e Migrantëve të Zhdukur.