Misionet e vëzhgimit janë pjesë e një përpjekjeje ndërkombëtare të udhëhequr nga SHBA-ja për t'u siguruar që armëpushimi i brishtë mes Izraelit dhe Hamasit të qëndrojë në fuqi.

Ushtria amerikane ka filluar kohët e fundit të përdorë dronë zbulues mbi Rripin e Gazës si pjesë e një nisme më të gjerë për të garantuar që si Izraeli ashtu edhe Hamasi të respektojnë marrëveshjen e armëpushimit. Sipas zyrtarëve ushtarakë izraelitë dhe amerikanë, këto fluturime po zhvillohen me miratimin e Izraelit dhe kanë për qëllim të vëzhgojnë aktivitetin në terren. Zyrtarët, të cilët folën në kushte anonimiteti për shkak të natyrës operative të misioneve, nuk dhanë hollësi mbi itineraret e dronëve. Ata shtuan se operacionet e mbikëqyrjes po mbështesin Qendrën e re të Koordinimit Civilo-Ushtarak në jug të Izraelit, e ngritur javën e kaluar nga Komanda Qendrore e ushtrisë amerikane për të monitoruar zbatimin e armëpushimit.

Marrëveshja e ndërmjetësuar këtë muaj nga SHBA, Katari dhe Egjipti është vënë në provë nga shpërthime të fundit dhune në Gazë dhe tensione mbi shkëmbimin e trupave të izraelitëve dhe palestinezëve të vrarë. Gjatë luftës dyvjeçare, ushtria izraelite e mbështetur nga SHBA-ja ka përdorur dronë për mbledhjen e informacioneve dhe për operacionet kundër Hamasit.

Edhe pse SHBA-ja ka ngritur më parë dronë mbi Gazë për të ndihmuar në gjetjen e pengjeve, misionet e fundit tregojnë dëshirën e Uashingtonit për të pasur një pamje të pavarur nga ajo e Izraelit mbi zhvillimet në terren. Departamenti i Shtetit nuk iu përgjigj pyetjeve lidhur me përdorimin e dronëve, ndërsa ushtria izraelite refuzoi të komentojë. Që pas vizitës së presidentit Trump në Izrael javën e kaluar, disa zyrtarë të lartë amerikanë, përfshirë zv/presidentin JD Vance dhe sekretarin e shtetit Marco Rubio, kanë qenë në vend për të forcuar marrëveshjen e armëpushimit. Disa zyrtarë të administratës Trump, që folën në kushte anonimiteti, shprehën shqetësimin se kryeministri izraelit Benjamin Netanyahu mund të tërhiqet nga marrëveshja.

Të premten, Rubio vizitoi Qendrën e re të Koordinimit Civilo-Ushtarak, ku shërbejnë rreth 200 ushtarakë amerikanë. Sipas ushtrisë, qendra ka për mision mbikëqyrjen e zbatimit të armëpushimit dhe ndihmën për lehtësimin e hyrjes së ndihmave humanitare, logjistike dhe të sigurisë nga partnerët ndërkombëtarë në territorin e Gazës. "Do të ketë ulje dhe ngritje, kthesa dhe sfida, por kemi arsye për optimizëm të kujdesshëm për përparimin që po bëhet," tha Rubio.

Izraeli dhe SHBA-ja mbeten të lidhura ngushtë në çështjet e sigurisë: Uashingtoni furnizon me armë dhe fonde Izraelin dhe të dy vendet shkëmbejnë informacione të ndjeshme. Më herët këtë vit, ata bashkëpunuan edhe në sulmet ajrore kundër objekteve bërthamore iraniane. Në fazat e para të luftës, SHBA-ja përdori dronët MQ-9 Reaper në Gazë për të ndihmuar në gjetjen e pengjeve dhe ndau me Izraelin informacionet për vendndodhjet e mundshme të tyre.

Një ish-diplomat dhe zyrtar amerikan i mbrojtjes, ashtu si disa zyrtarë izraelitë, u shprehën të habitur nga operacionet e fundit të mbikëqyrjes amerikane, duke pasur parasysh bashkëpunimin e ngushtë ushtarak mes dy vendeve. "Kjo është një formë shumë ndërhyrëse e mbikëqyrjes amerikane në një front që Izraeli e sheh si kërcënim aktiv," tha Daniel B. Shapiro, ish-ambasador i SHBA-së në Izrael gjatë administratës së Barack Obamës dhe më pas i dërguar i posaçëm për Iranin nën presidencën e Joseph R. Biden, Jr.

"Nëse do të kishte transparencë dhe besim të plotë mes Izraelit dhe SHBA-së, një gjë e tillë nuk do të ishte e nevojshme," shtoi ai. "Por duket se SHBA-ja dëshiron të shmangë çdo mundësi keqkuptimi."

Kapiten Timothy Hawkins, zëdhënës i Komandës Qendrore të Pentagonit, tha në një intervistë për kanalin izraelit i24 të enjten se Qendra e Koordinimit Civilo-Ushtarak "përfshin një sallë operative që na lejon të monitorojmë në kohë reale çfarë ndodh në terren në Gazë." Ai shtoi se po "punojnë shumë fort" për ta mbajtur armëpushimin në fuqi, duke pranuar se situata mbetet "shumë e brishtë." / NYT - Syri.net