Departamenti i Shtetit revokoi të paktën gjashtë viza për të huajt që festuan publikisht vrasjen e aktivistit konservator Charlie Kirk në mediat sociale, njoftoi departamenti të martën.

Ky veprim ka tërhequr kritika nga mbrojtësit e lirisë së fjalës dhe ka nxitur një grup mbrojtës ligjor të ofrojë ndihmë falas për të prekurit.

Në një postim në X , Departamenti i Shtetit tha se ndërmori veprime kundër individëve nga Argjentina, Afrika e Jugut, Meksika, Brazili, Gjermania dhe Paraguai, duke ndarë shembuj të postimeve në mediat sociale që festonin vrasjen e Kirkut gjatë një debati universitar në Utah muajin e kaluar.

“Shtetet e Bashkuara nuk kanë detyrim të presin të huaj që u dëshirojnë vdekjen amerikanëve”, tha departamenti. “Departamenti i Shtetit vazhdon të identifikojë mbajtësit e vizave që festuan vrasjen e tmerrshme të Charlie Kirk.”

Departamenti nuk i identifikoi mbajtësit e vizave me emër dhe as nuk specifikoi se çfarë lloji vizash u revokuan.

Revokimi erdhi pas paralajmërimeve të mëparshme nga Sekretari i Shtetit Marco Rubio se të huajt me viza që lëvdonin vdekjen e Kirk duhet të “përgatiten për t’u deportuar”. Një ditë pas të shtënave me armë zjarri ndaj Kirk, Zëvendës Sekretari i Shtetit, Christopher Landau udhëzoi zyrtarët konsullorë që të monitoronin komente të tilla në mediat sociale dhe të identifikonin autorët e tyre.

Disa orë pas njoftimit, avokati i imigracionit Eric Lee, një bashkëthemelues i Projektit të Llogaridhënies Konsullore, shkroi në mediat sociale se organizata e mbrojtjes ligjore do të përfaqësonte pa pagesë këdo, të cilit i ishte refuzuar ose revokuar viza për shkak të "fjalimit në lidhje me Charlie Kirk".

Lee më parë ka mbrojtur studentët dhe aktivistët e huaj, të cilëve u janë revokuar vizat për fjalime politike. Ai ka sfiduar kufizimet e vizave të administratës Trump, që synojnë protestuesit pro-palestinezë nëpër kampuset universitare.

Ish-këshilltari i Barack Obamës, David Axelrod, kritikoi veprimet e administratës në X, duke shkruar: “SHBA-të revokon vizat për 6 të huaj për komente tallëse pas vdekjes në lidhje me Charlie Kirk – i cili, ironikisht, ishte një kampion i vetëshpallur i lirisë së fjalës!”

Kirk ishte një zë i shquar politik në lëvizjen konservatore. Ai themeloi Turning Point USA, një grup që mobilizoi votuesit e rinj rreth kauzave të krahut të djathtë dhe u bë një lojtar kyç në lëvizjen politike të Presidentit Donald Trump. I njohur për debatet e tij ideologjike polarizuese në kampuset e kolegjeve, ai ndërtoi një numër të madh ndjekësish në mediat sociale dhe zhvilloi lidhje të ngushta me Trump, zëvendëspresidentin JD Vance dhe udhëheqës të tjerë republikanë. Ai luajti një rol kritik në rizgjedhjen e Trump, duke rritur tërheqjen e tij ndaj votuesve të rinj.

Kirk u qëllua për vdekje në shtator ndërsa fliste në një aktivitet të TPUSA në Universitetin e Luginës së Utah-ut, duke shkaktuar debate kombëtare mbi dhunën politike dhe lirinë e fjalës.

Njoftimi i Departamentit të Shtetit erdhi menjëherë pasi Trump i dha Kirkut pas vdekjes Medaljen Presidenciale të Lirisë, çmimin më të lartë civil të vendit, në atë që do të kishte qenë ditëlindja e tij e 32-të./ Politico.