'Gjithçka do të shkojë mirë'/ Reagimet e Donald Trump nxisin tregjet evropiane, shënohet rritje në çdo sektor

Indekset kryesore të aksioneve në Evropë u rritën të hënën, pasi Presidenti i Shteteve të Bashkuara dha sinjale qetësuese lidhur me tensionet tregtare në rritje midis Uashingtonit dhe Pekinit. Optimzmi në tregje u mbështet gjithashtu nga lajmet për një armëpushim në Gaza dhe zotimet e qeverisë së re franceze për të vendosur rregull në financat publike.

Pas një fundjave të turbullt për investitorët, tregjet evropiane dhe amerikane panë një valë lehtësimi në sesionin e parë të javës. Aksionet në Londër, Paris dhe Frankfurt u rritën në përputhje me kontratat me afat të ardhshëm në SHBA, ndërsa kriptovalutat dhe metalet e çmuara shënuan gjithashtu fitime.

Rritje në bursat kryesore evropiane

Rreth orës 10:00 CET, indeksi FTSE 100 në Londër ishte rritur me 0.3%, CAC 40 në Paris fitoi 0.7%, ndërsa DAX në Frankfurt u rrit me 0.5%. Në Madrid, Ibex 35 shtoi 0.8%, ndërsa Stoxx 600, indeksi referues i Evropës, u rrit me gati 0.5%.

Ky rikthim vjen pas një rënieje të fortë në Wall Street të premten, kur indekset kryesore amerikane humbën midis 1.9% dhe 3.6%, pas kërcënimeve të Presidentit amerikan Donald Trump për rritje të tarifave ndaj Kinës. Ai reagoi ndaj kufizimeve të reja të Pekinit mbi eksportet e metaleve të rralla – materiale thelbësore për prodhimin e elektronikës dhe industrisë së mbrojtjes.

Megjithatë, komentet optimiste të Presidentit në rrjetet sociale, ku tha se “mos u shqetësoni për Kinën, gjithçka do të shkojë mirë”, duket se i kthyen pritshmëritë e investitorëve drejt pozitivitetit.

Kriptovalutat dhe metalet e çmuara në rritje

Pas rënies së ndjeshme të së premtes, Bitcoin u ngjit në afërsi të 115,000 dollarëve, ndërsa Ethereum kaloi kufirin e 4,200 dollarëve. Kapitalizimi i përgjithshëm i tregut të kriptomonedhave u rrit me 4.4%, duke arritur në 3.9 trilionë dollarë, sipas analistit të FxPro, Alex Kuptsikevich.

Ari u forcua me mbi 2.3%, duke u tregtuar në 4,092 dollarë për ons, ndërsa çmimet e naftës gjithashtu u rritën: WTI fitoi 0.9% në 59.85 dollarë për fuçi, ndërsa Brent u rrit me 1.5%, duke u tregtuar në 63.69 dollarë për fuçi.

Kontratat amerikane në rritje

Në tregjet e kontratave me afat të ardhshëm, S&P 500 fitoi 1.1%, Dow Jones u rrit me 1.5%, ndërsa Nasdaq avancoi me 2% deri në orën 10:30 CET.

Në tregjet valutore, dollari amerikan u forcua lehtë ndaj jenit japonez, duke u rritur në 152.22 jenë nga 151.89 të premten, ndërsa euro ra lehtë në 1.1605 dollarë.