Armëpushimi në Gaza/ Si do të lirohen pengjet?

Ushtria izraelite njoftoi të premten se ka “filluar pozicionimin” e trupave përgjatë vijave të përcaktuara në marrëveshjen e armëpushimit, e cila hyri në fuqi në orën 12:00 (10:00 BST). Që nga ky moment, filloi një numërim mbrapsht 72-orësh, gjatë të cilit Hamasi duhet të lirojë 20 pengjet që besohet se janë ende gjallë.

Detajet e sakta të lirimit të tyre mbeten të paqarta, por dorëzimet e mëparshme të pengjeve janë koordinuar nga Kryqi i Kuq, i cili i ka transferuar në Izrael. Prej andej, pengjet transportohen me helikopter në spitalet izraelite për kontrolle mjekësore dhe ribashkim me familjet e tyre. Trupat e pengjeve të ndjerë do të kthehen gjithashtu, edhe pse nuk dihet se sa kohë mund të zgjasë ky proces.

Një kopje e marrëveshjes e publikuar nga mediat izraelite tregon se dorëzimet do të zhvillohen “pa asnjë ceremoni publike apo mbulim mediatik”, duke shmangur koreografi të larta të Hamasit që shoqëronin dorëzimet e mëparshme.

Gjatë këtij procesi pritet të lirohen rreth 250 të burgosur palestinezë që vuajnë dënime të përjetshme në burgjet izraelite, si dhe 1,700 të paraburgosur nga Gaza. Po ashtu, parashikohet hyrja e rreth 600 kamionëve me ndihma humanitare çdo ditë.

Pasi të përfundojë kjo fazë, pritet të fillojnë negociatat mbi fazat e mëvonshme të planit 20-pikësh të Presidentit Donald Trump.