Historike - Trump: Izraeli dhe Hamasi nënshkruajnë ‘fazën e parë’ të planit të paqes

Presidenti i Shteteve të Bashkuara, Donald Trump, ka njoftuar se Izraeli dhe Hamasi kanë rënë dakord për “fazën e parë” të një kuadri paqeje që synon t’i japë fund luftës dhe të mundësojë lirimin e plotë të pengjeve.

Në një postim në platformën e tij Truth Social, Trump shkroi:

“Jam shumë krenar të njoftoj se Izraeli dhe Hamasi kanë nënshkruar të dy Fazën e parë të Planit tonë të Paqes. Kjo do të thotë që të gjithë pengjet do të lirohen shumë shpejt dhe Izraeli do të tërheqë trupat e tij në një vijë të rënë dakord si hapat e parë drejt një paqeje të fortë, të qëndrueshme dhe të përjetshme. Të gjitha palët do të trajtohen në mënyrë të drejtë!”

Trump falënderoi ndërmjetësit nga Katari, Egjipti dhe Turqia, të cilët, sipas tij, luajtën një rol kyç në arritjen e kësaj marrëveshjeje “historike dhe të pashembullt”. Ai e përshkroi ditën si “një ditë të madhe për botën arabe dhe myslimane, Izraelin, kombet përreth dhe SHBA-në”.

Sipas një zyrtari të Hamasit, si pjesë e marrëveshjes, të dyja palët kanë shkëmbyer lista të pengjeve dhe të burgosurve që pritet të lirohen në ditët e ardhshme.

Ndërkohë, raportime nga organizatorë të ndihmave humanitare thonë se Izraeli ka ndaluar një tjetër flotë anijesh ndihmash që po udhëtonin drejt Gazës, me gazetarë, aktivistë dhe profesionistë mjekësorë në bord.

Trump ka thënë më herët se mund të udhëtojë në Lindjen e Mesme “pasi të arrihet një marrëveshje e plotë”, duke sinjalizuar një rol të ri aktiv të SHBA-së në procesin e paqes.