Udhëheqësi i Koresë së Veriut, Kim Jong Un, mbërriti sot në Pekin me trenin e tij të blinduar për të marrë pjesë në një paradë të madhe ushtarake në kryeqytetin kinez, ku prania e tij pranë presidentëve Xi Jinping dhe Vladimir Putin pritet të jetë historike.

Kim u largua nga Pheniani të hënën dhe kaloi kufirin gjatë natës, ndërsa Kina përgatitet për të shënuar 80-vjetorin e përfundimit të Luftës së Dytë Botërore. Udhëtimi i tij 1,300-kilometrash zgjati pothuajse një ditë të tërë, dhe mbërritja pritet të mbahet në fshehtësi, si shumë nga aktivitetet e tij.

Agjencia shtetërore e Koresë së Veriut, KCNA, publikoi foto të Kim Jong Un duke pirë cigare dhe duke u ulur me ndihmësit në një tavolinë përpara flamurit kombëtar në një ndarje të brendshme të treni të zbukuruar me ar.

Kim Jong-un është midis 26 krerëve të shteteve dhe qeverive të ftuar në paradën e organizuar nga Presidenti kinez Xi Jinping, ku do të marrë pjesë edhe Presidenti rus Vladimir Putin. Protokolli që lidhet me pritjen dhe qëndrimin e tij po mbahet sekret, dhe inteligjenca e Koresë së Jugut pret që Kim të marrë “trajtim të veçantë” pranë udhëheqësve kinezë dhe rusë.

Spekulimet për një takim të mundshëm midis Kim, Xi dhe Putin janë të shumta, ndërsa shfaqja e Kim Jong-un në publik tashmë konsiderohet një ngjarje e paprecedentë. Kina synon të demonstrojë fuqinë e saj ushtarake dhe ndikimin diplomatik në një kohë të rritjes së rivalitetit me Shtetet e Bashkuara.

Siguria në Pekin është forcuar, me ushtarë dhe barriera metalike përgjatë rrugëve, ndërsa vizita e Kim tregon pranimin e Koresë së Veriut si pjesë e grupit të vendeve aleate të Kinës dhe Rusisë. Koreja e Veriut është bërë një aleat kryesor i Rusisë në luftën në Ukrainë, duke dërguar trupa dhe armë, ndërsa marrëdhëniet midis Kinës, Rusisë, SHBA-së dhe Europës mbeten të tendosura.