'Evropa duhet të përcaktojë qartë garancitë e saj të sigurisë', Zelensky: Bombardimet në Kiev, përgjigjja e Putinit ndaj thirrjeve për paqe

Udhëheqësit evropianë mund të jenë duke shqyrtuar një mundësi të re për të mbuluar sigurinë e Ukrainës në rast të një marrëveshjeje paqeje.

Lidhur me temën e garancive të sigurisë, presidenti ukrainas Volodymyr Zelenskyy u tha disa prej këtyre udhëheqësve mbrëmë se Kievi ka nevojë për “përgjigje të qarta”.

Në një takim virtual me presidentin polak dhe udhëheqësit e Estonisë, Letonisë, Lituanisë dhe Danimarkës, ai tha : “Kush do të na ndihmojë të mbrohemi në tokë, në ajër dhe në det nëse Rusia vjen përsëri?”

“Dhe si saktësisht mund të merrni pjesë. Po ju kërkoj të përcaktoni rolin tuaj”, pyeti ai.

Ai shtoi se është “e rëndësishme që Presidenti Trump të shohë se ne në Evropë jemi të bashkuar në vendosmërinë tonë për t’i dhënë fund luftës”.

Ai përsëriti gjithashtu thirrjet e tij për sanksione më të ashpra ndaj Rusisë. Duke iu referuar sulmit të djeshëm në Kiev, ai tha: “Kjo është përgjigjja e Putinit ndaj thirrjeve të botës për të ndaluar luftën”.

“Rusia refuzoi të ndalonte vrasjet – ata madje i thanë ‘jo’ Presidentit Trump. Po shohim sinjale negative nga Rusia në lidhje me një samit të mundshëm të liderëve. Sinqerisht, mendojmë se Putini është ende i interesuar vetëm në vazhdimin e kësaj lufte. Pikërisht për këtë arsye na duhet presion i ri dhe i fortë mbi Rusinë – sanksione të ashpra, tarifa të forta, si nga Evropa ashtu edhe nga Amerika”, theksoi Zelensky.