Zelensky akuzon Moskën se po përpiqet të shmangë organizimin e një takimi me Putinin

Presidenti ukrainas Volodymyr Zelensky ka akuzuar Rusinë se po përpiqet të shmangë një takim shumë të nevojshëm me Presidentin Vladimir Putin për të gjetur një zgjidhje për luftën e nisur nga pushtimi rus në Ukrainë.

“Aktualisht, sinjalet e dërguara nga Rusia janë thjesht të pahijshme. Ata duan të shmangin organizimin e një takimi”, tha Zelensky në fjalimin e tij të përditshëm në rrjetet sociale.

Kreu i shtetit ukrainas theksoi se Ukraina po zhvillon takime intensive për të përcaktuar se çfarë garancish sigurie janë të gatshëm të ofrojnë aleatët ndërkombëtarë. Sipas tij, Shtetet e Bashkuara kanë shprehur mbështetjen për diskutimet që synojnë përfundimin e konfliktit ruso-ukrainas.

Detajet, sipas Zelenskyt, po përpunohen nga këshilltarët e sigurisë kombëtare dhe zyrtarët ushtarakë. Ai u shpreh se brenda 10 ditësh pritet të ketë më shumë informacion dhe të jetë i gatshëm për zhvillimin e bisedimeve të drejtpërdrejta me Presidentin rus Vladimir Putin, për herë të parë që prej nisjes së pushtimit.