Autoritetet ukrainase: Rusia sulmoi me 614 dronë dhe raketa, një person u vra

Rusia lëshoi 574 dronë dhe 40 raketa në territorin e Ukrainës gjatë natës mes të mërkurës dhe të enjtes, duke shkaktuar të paktën një viktimë, njoftuan autoritetet ukrainase. Ky konsiderohet sulmi më i madh ajror që nga mesi i korrikut, pavarësisht intensifikimit të përpjekjeve diplomatike të SHBA-së për arritjen e një paqeje.

Forcat Ajrore të Ukrainës raportuan se “armiku kreu gjithsej 614 sulme ajrore”, ndërsa mbrojtja ukrainase arriti të rrëzonte 546 dronë dhe 31 raketa. Sulmet prekën disa rajone të vendit, ndërsa autoritetet lokale konfirmuan se një person humbi jetën në Ukrainën perëndimore.

Ky eskalim i ri vjen në një moment kur presioni ndërkombëtar për një armëpushim të qëndrueshëm po rritet, por ofensiva ruse vijon të tregojë vendosmërinë e Moskës për të mbajtur presionin mbi Kievin.