Siria dhe Izraeli zhvillojnë bisedimet e para të drejtpërdrejta në takimin e ndërmjetësuar nga SHBA-të

Siria dhe Izraeli zhvilluan të martën bisedimet e tyre të para të njohura drejtpërdrejt, të ndërmjetësuara nga Shtetet e Bashkuara, me synim rivendosjen e marrëveshjes së armëpushimit të vitit 1974.

Takimi u mbajt mes ministrit të Jashtëm sirian, Asaad al-Shibani, dhe një delegacioni izraelit, në një përpjekje për të ulur tensionet rajonale pas përmbysjes së regjimit të Bashar al-Assad.

Agjencia shtetërore siriane SANA raportoi se diskutimet u përqendruan në ringritjen e zonës tampon të krijuar sipas marrëveshjes së vitit 1974, e cila parashikonte ndërprerjen e luftimeve dhe vendosjen e paqeruajtësve të OKB-së.

Megjithatë, as pala siriane dhe as ajo izraelite nuk dhanë detaje zyrtare mbi përmbajtjen e bisedimeve. Një zyrtar i lartë i administratës Trump konfirmoi takimin, duke theksuar se Uashingtoni po ushtron presion për normalizimin e marrëdhënieve midis dy vendeve.

Sipas të njëjtit burim, Presidenti Donald Trump synon një “Lindje të Mesme të begatë”, ku përfshihet një “Siri e qëndrueshme dhe në paqe me fqinjët e saj, përfshirë Izraelin”. Zyrtarët amerikanë theksuan se do të mbështesin çdo përpjekje që çon drejt stabilitetit dhe paqes së qëndrueshme në rajon.

Takimi shënon herën e parë që Siria pranon publikisht zhvillimin e bisedimeve direkte me Izraelin, në një kohë kur tensionet kanë arritur kulmin pas rrëzimit të Assad në dhjetor. Pas marrjes së pushtetit nga presidenti i përkohshëm Ahmed al-Sharaa, forcat izraelite morën kontrollin e zonës së patrulluar më herët nga OKB-ja, duke nisur edhe një fushatë sulmesh ajrore për të parandaluar vendosjen e forcave armiqësore.

Vetëm muajin e kaluar, Izraeli ndërhyri me dhjetëra sulme ajrore pas shpërthimit të dhunës mes klaneve beduine dhe pakicës druze në provincën Suwayda. Tel Avivi e justifikoi ndërhyrjen si një përpjekje për të mbrojtur komunitetin Druze, pjesë e të cilit jeton brenda territorit izraelit.