Roy DeMeo, ekzekutori famëkeq i mafias amerikane dhe 'Metoda Gemini'

Roy DeMeo u bë një nga figurat më të frikshme të botës së krimit në SHBA, duke fituar reputacion për mizorinë dhe efikasitetin e tij në eliminimin e kundërshtarëve.

Viktimat e tij varionin nga trafikantë droge dhe informatorë, deri tek partnerë biznesi apo edhe anëtarë të mafias që kishin rënë në mospëlqimin e tij.

Shumë prej tyre u vranë sepse kishin kundërshtuar DeMeo-n, ndërsa të tjerë u synuan thjesht për përfitime financiare. Autoritetet e lidhën më vonë grupin e tij me një numër tronditës vrasjesh, që llogaritet të jetë nga 70 deri mbi 200.

Ajo që e bëri DeMeo-n famëkeq ishte metoda e tij e ekzekutimit, e njohur si “Metoda Gemini”. Shumica e vrasjeve kryheshin në “Gemini Lounge”, një bar i vogël në Brooklyn, që shërbente si qendër ekzekutimesh.

Viktimat ftoheshin në dhomën e pasme me pretekstin e një takimi. Atje, njëri nga anëtarët e grupit i qëllonte në kokë, ndërsa tjetri mbështillte menjëherë plagën me peshqir për të parandaluar gjurmët e gjakut. Një goditje me thikë në zemër ndalonte gjakderdhjen, trupi më pas pritej në copa dhe fshihej në thasë plastike, të cilat hidheshin në mbeturina.

“Gemini Lounge” gjatë viteve të sundimit të DeMeo-s u kthye në simbol të frikës.

Nga jashtë dukej një bar i zakonshëm lagjeje, por në të vërtetë ishte një kasaphanë ku shumë persona hynin dhe nuk dilnin më kurrë. Banorët flisnin me zë të ulët për zhdukjet misterioze, ndërsa hetimet e mëvonshme zbuluan se godina ishte përdorur për vite me radhë si vend ekzekutimesh nga mafia.

Në vitin 1983, edhe vetë Roy DeMeo përfundoi i vrarë, me trupin e mbushur me plumba të gjetur në bagazhin e makinës së tij.

Deri atëherë, emri i tij ishte shndërruar në legjendë për brutalitetin e pazakontë, aq sa edhe krerët e Gambino-s e konsideruan një rrezik të madh për organizatën. Fundi i tij erdhi kur frika që përhapte kaloi kufijtë e pranueshëm edhe për botën e mafias.