SHBA: Paralajmërim për karkalecë të ngrirë të kontaminuar potencialisht radioaktivë të shitur në Walmart

Rregullatorët amerikanë kanë paralajmëruar konsumatorët që të mos konsumojnë apo të mos shërbejnë karkalecë të ngrirë të markës Great Value, pasi tek disa prej tyre është zbuluar izotopi radioaktiv Cesium-137, i cili mund të shkaktojë rrezik të shtuar për kancer.

Administrata e Ushqimit dhe Barnave (FDA) njoftoi se produktet e shitura nga Walmart janë tërhequr nga tregu pasi doganat amerikane zbuluan kontaminim në kontejnerët e furnitorit në portet e Los Anxhelosit, Hjustonit, Savannah dhe Majamit.

Produktet e tërhequra nga tregu janë:

• Great Value frozen raw shrimp, lot code: 8005540-1, Best by Date: 15/03/2027

• Great Value frozen raw shrimp, lot code: 8005538-1, Best by Date: 15/03/2027

• Great Value frozen raw shrimp, lot code: 8005539-1, Best by Date: 15/03/2027

FDA ka bërë thirrje për konsumatorët që kanë blerë karkalecë të këtij lloji t’i hedhin menjëherë dhe të mos i konsumojnë.

Testimet laboratorike të FDA konfirmuan praninë e Cs-137 edhe në një mostër të karkalecëve të përpunuar nga furnitori indonezian PT. Bahari Makmur Sejati (BMS Foods). Si pasojë, është ndaluar importi i produkteve të kësaj kompanie në SHBA.

“Shëndeti dhe siguria e klientëve tanë është gjithmonë prioritet. Ne kemi pezulluar shitjet dhe kemi hequr produktin nga dyqanet tona të prekura,” tha një zëdhënës i Walmart.
Hetimet mbi shkakun e kontaminimit po vijojnë, ndërsa autoritetet doganore amerikane po bashkëpunojnë me agjencitë rregullatore të detit në Indonezi.