Trump: Putini mund të mos dojë marrëveshje, Zelensky duhet të jetë fleksibël! S'dërgojmë trupa amerikane në Ukrainë

Presidenti i Shteteve të Bashkuara, Donald Trump, deklaroi sot se shpreson se presidenti i Rusisë, Vladimir Putin, do të ndërmarrë hapa drejt përfundimit të luftës në Ukrainë, por e pranoi se lideri rus mund të mos dëshirojë fare të bëjë marrëveshje.

Por, sipas tij, mungesa e një marrëveshjeje do të krijonte "situatë të vështirë" për Putinin.

Në një intervistë për Fox News, Trump tha se pret që Putini t’i bëjë të qarta veprimet e tij në javët e në vijim.

Ja deklaratat më të rëndësishme të Trump gjatë intervistës në Fox News

- Trump tha se po përgatit një takim mes liderit rus Vladimir Putin dhe Zelensky-t, ku fillimisht ai vetë nuk do të jetë pjesë. “Nëse funksionon, atëherë unë do të marr pjesë në [takimin trepalësh] dhe do ta mbyll,” u shpreh ai.

-Ai tha se shpreson që Zelensky të tregojë “pak fleksibilitet” në negociata.

-Trump theksoi qartë se trupat amerikane nuk do të jenë në Ukrainë si pjesë e garancive të sigurisë që kërkon Kievi, por  vendet europiane mund të kenë trupa në Ukrainë si pjesë e një marrëveshjeje.

-Ukraina dhe aleatët e NATO-s duhet të heqin dorë nga përpjekjet për anëtarësimin e Ukrainës në aleancën e sigurisë dhe nga kërkesa për rikthimin e Krimesë, të cilën Rusia e pushtoi në vitin 2014. “Të dyja këto janë të pamundura,” u shpreh Trump.

-Trump tha se telefonata e tij me Putinin dje nuk u zhvillua në prani të europianëve dhe aleatëve të NATO-s. “Mendova se do të ishte mungesë respekti ndaj presidentit Putin,” tha ai.