Antifa Inc: Si një ideologji u shndërrua në një rrjet të organizuar kriminal

Nga Mia Cathell/

Teorikisht, antifa është një lëvizje e decentralizuar, e majtë, e përbërë nga rrjete të "rezistencës" që veprojnë kryesisht në bastione të demokratëve. Por vitet e fundit, forcat e antifës janë bërë shumë të organizuara dhe gjithnjë e më të sofistikuara, me celula të krimit të organizuar që po shfaqen në të gjithë vendin. Kjo seri e Washington Examiner, Antifa, Inc., do të dokumentojë ngritjen e antifës në Amerikë, do të shuajë keqkuptimet moderne rreth saj dhe do të shqyrtojë nëse në të ardhmen mund të ndodhin akuza sipas ligjit RICO apo një klasifikim si organizatë e brendshme terroriste.

Pjesa 1: Si është përhapur lëvizja antifa

"Antifa është një ide, jo një organizatë," deklaroi Joe Biden, ish-kandidati demokrat për president, gjatë debatit në vitin 2020.

"Jo një milici," nguli këmbë Biden, në mes të mbi 100 netëve të njëpasnjëshme të sulmeve të udhëhequra nga antifa mbi pronat federale, stacionet e policisë dhe bizneset në qendër të Portlandit, Oregon.

Antifa, shkurtim për antifashist, është në të vërtetë një ideologji ekstremiste, një përzierje e bindjeve anarko-komuniste që kundërshtojnë kundërshtarë dhe politika që perceptohen si "fashiste". Megjithatë, mësimet e saj të majta i kanë nxitur anëtarët e vetëidentifikuar të mblidhen, të krijojnë fraksione dhe të kryejnë krime në emër të të ashtuquajturit aktivizëm "antifashist".

Ndërsa demokratët dhe mediat liberale e minimizojnë kërcënimin e militantizmit antifa duke e paraqitur atë si një gogol të së djathtës, kjo lëvizje mbarëkombëtare po rritet në numër dhe po evoluon në operacione kriminale të nivelit të lartë.

Pjesa 2: A mund të përballen bashkëpunëtorët e antifës me akuza sipas ligjit RICO?

Pyetja nëse antifa është, në fakt, një organizatë, është një çështje ligjore e debatuar prej kohësh, me të cilën Uashingtoni është përballur për vite të tëra.

Debati i ka lënë të hutuar disa ligjvënës, të pasigurt mbi kornizën fizike të antifës, ndërkohë që i ka shtyrë të tjerë të kërkojnë të zbulojnë militantët e përfshirë në përpjekje të nivelit të lartë, ndonjëherë edhe të gjerë, të koordinuara.

Megjithëse shumë kapituj të antifës mbajnë tiparet e një ndërmarrjeje kriminale, natyra anonime dhe në dukje amorfe e antifës ngre pyetje nëse një lëvizje e shpërndarë, e supozuar pa lider, mund të akuzohet penalisht sipas ligjit federal për zhvatje dhe konspiracion (RICO).

Pjesa 3: Shpallja e antifës organizatë e brendshme terroriste

Administrata e Trump-it dhe republikanët në Kongres e kanë shqyrtuar prej kohësh idenë e shpalljes së antifës si një organizatë e brendshme terroriste.

Megjithatë, përdorimi i termit "terroristë" për të përshkruar, identifikuar dhe sanksionuar grupet të brendshme mbetet një temë e diskutueshme dhe konsiderohet e politizuar nga vëzhguesit e të dyja palëve politike.

Sipas statutit federal aktual, etiketimi i antifës si kërcënim i brendshëm terrorist do të ishte kryesisht simbolik, edhe pse disa mbështetës përkrahin dërgimin e një mesazhi publik ndërsa forcat e antifës vazhdojnë të frikësojnë komunitetet. / Washington Examiner - Syri.net