Varësia e Irlandës nga kokaina ka mbërritur në 'dasma e funerale...'

Një anije e ngarkuar me kokainë shmanget nga një mjet detar i marinës irlandeze që e ndjek. Bëhet qitje paralajmëruese. Më në fund, trupa zbresin në bord nga një helikopter në mes të erërave të forta.

Operacioni i vitit 2023 ishte goditja më e madhe dhe më spektakolare e drogës në Irlandë. Kombi është tani një nga përdoruesit më të mëdhenj të kokainës në botë, dhe bregdeti i tij i ashpër tërheq kontrabandistë që kërkojnë të hyjnë në BE.

"Tre vitet e fundit kemi pasur sekuestrime rekord të kokainës," tha Ruth Kennedy, një komisionere e shërbimit të të ardhurave në Irlandë, përgjegjëse për doganat.

Me prodhimin e kokainës në Amerikën Latine në nivele rekord, droga është bërë më e përhapur në një vend që nxori një nga kartelet më famëkeqe të drogës në Europë, bandën Kinahan, shefi i së cilës, Daniel Kinahan, fshihet në Dubai. Shkallët e varësisë janë rritur, me më shumë njerëz që kërkojnë trajtim, sipas Bordit të Kërkimeve Shëndetësore të shtetit irlandez.

Joe Treacy, specialist i varësive në County Galway, në bregun perëndimor të Irlandës, thotë se problemi nuk ka qenë kurrë më i madh gjatë tri dekadave të karrierës së tij.

"Po shoh përdorim masiv. Tashmë është bërë diçka e zakonshme, pjesë e jetës shoqërore," shton ai. "Dasma, funerale, çdo rast, duket sikur është parakusht që kokaina të jetë e disponueshme. Të gjitha moshat, nga 16 deri në 90 vjeç."

Ndërhyrja në det ndaj MV Matthew përfundoi me sekuestrimin e 2.2 tonëve kokainë me një vlerë në rrugë prej 157 milionë eurosh.

Që nga rasti i Matthew, deri në fillim të korrikut janë kryer mbi 150 sekuestrime të tjera që arrijnë në gati 1.5 tonë, përfshirë 440 kg me 1 korrik. "Sa të tjera nuk i kapim dot?" pyet Treacy.

Sipas një raporti të OKB-së në vitin 2023, Irlanda renditet e katërta në botë për përdorim të kokainës, pas Australisë, Spanjës dhe Holandës, në të njëjtin nivel me SHBA-në dhe Austrinë, dhe përpara Mbretërisë së Bashkuar.

Por të dhënat për Irlandën në atë studim ishin nga viti 2019, dhe dëshmitë tregojnë se përdorimi ka vazhduar të rritet që atëherë.

Sasia e kokainës e sekuestruar këtë vit është dhjetë herë më e lartë se e gjithë ajo e vitit 2019. Në shtatë vitet e fundit, numri i njerëzve që kërkojnë trajtim për kokainë është rritur me 250 për qind, sipas HRB-së.

Qendra Rutland, një nga institucionet kryesore të trajtimit të varësive në Irlandë, raportoi një rritje 35 për qind të përdorimit të kokainës në vitin 2024, një nga rritjet më të forta njëvjeçare që ka regjistruar ndonjëherë për çdo drogë.

Dublini është ndër qytetet më të mëdha në Europë për konsum të kokainës, sipas një analize të ujërave të zeza nga Agjencia e Drogave e BE-së vitin e kaluar.

Ndërkohë, konsumi i alkoolit në Irlandë ka rënë me 31 për qind gjatë çerekshekullit të fundit. Pothuaj një e treta e popullsisë nuk pinë fare, sipas HRB-së.

Vetë Irlanda, me 5.4 milionë banorë, është një treg shumë i vogël, por ajo ofron një portë hyrëse drejt Mbretërisë së Bashkuar dhe BE-së. Një tërheqje shtesë për kriminelët mund të jetë fakti që marina e saj ka vetëm tetë anije, nga të cilat vetëm tre mund të dalin në det në të njëjtën kohë. Vetëm dy anije doganore janë në dispozicion për të mbrojtur bregdetin e saj prej gati 3200 kilometrash.

Plazhet e saj të largëta tërheqin kartelet që kërkojnë rrugë të reja për furnizimet e tyre të kokainës që po shpërthejnë. Të mbjellat e kokainës në Kolumbi çuan prodhimin global në një rekord prej 3708 tonësh në vitin 2023, sipas OKB-së, 34 për qind më shumë se në vitin 2022.

"Nëse e zbarkon diçka në Irlandë, atëherë je brenda Bashkimit Europian," tha Séamus Boland, drejtues i Byrosë Kombëtare të Drogave dhe Krimit të Organizuar, pjesë e policisë irlandeze, An Garda Síochána.

"Nga problemet më të mëdha në Europë sot janë shkarkimet në det," shtoi ai. Ishte metoda që MV Matthew synonte të përdorte në vitin 2023.

Anija e regjistruar në Panama, që ishte nisur nga ishulli karaibian të Kuraçaos pranë bregut të Venezuelës, ishte "anija mëmë". Ajo planifikonte ta transferonte ngarkesën në një peshkarexhë të blerë në Irlandë dhe të paguar nga një grup kriminal.

Planet dështuan kur anija "bijë", e cila duhej të merrte kokainën në det, doli në tokë, duke lënë një ekuipazh gjithnjë e më të shqetësuar në Matthew të komunikonte me mesazhe zanore me "Kapiten Noen", gangsterin në Dubai që mbikëqyrte operacionin.

Një anije patrulle irlandeze, LÉ WB Yeats, nisi ndjekjen. "Qëllova për paralajmërim. A e kuptoni?" komunikoi në radio komandanti detar, sipas një videoje të publikuar nga policia irlandeze në fillim të korrikut.

"Luftanija irlandeze, ju lutem mos na qëlloni," erdhi përgjigjja. Por ishte tepër vonë dhe komandoja elitë reinxhers, forcat speciale të Irlandës, zbritën me litarë në anije ndërsa ajo përplasej nga një stuhi detare.

Zyrtarët nuk kanë treguar se për kë dyshojnë pas ngarkesës, por Angela Willis, ndihmëskomisionere e Gardës për krimin e organizuar, tha se ishte "e arsyeshme të supozohet se ishin të përfshirë Kinahanët".

Irlanda ka goditur ashpër krimin e organizuar dhe shënoi një fitore ndaj Kinahanëve në maj, kur "besniku më i afërt" i Daniel Kinahanit u ekstradua në Dublin nga Emiratet e Bashkuara Arabe, një lëvizje e parë si përgatitje për të sjellë edhe vetë shefin.

Në fillim të korrikut, tetë marinarët e përfshirë në operacionin e MV Matthew u dënuan me gjithsej 129 vite burg.

Pas dënimit, detektivi Joe O'Reilly nga Byroja e Drogave dhe Krimit të Organizuar tha se mesazhi ishte i qartë: "Irlanda nuk është një shënjestër e lehtë."

Treacy tha se kokaina përdoret nga të gjitha shtresat e njerëzve, nga fermerë te biznesmenë, dhe ai pa gjithashtu një lidhje me një qëndrim ndonjëherë "të pakujdesshëm" ndaj alkoolit. Pavarësisht rënies së konsumit të përgjithshëm, pirja e tepërt, e përcaktuar si gjashtë pije ose më shumë në një rast të vetëm, është në rritje.

Por lufta e vendit me drogat është larg fundit. "Po punësojmë në maksimum, kemi shumë para," tha Willis. "Dhe njerëzit nuk po bëjnë lidhjen mes një vize kokaine dhe vrasjes e mjerimit që sjellin grupet e krimit të organizuar." / Financial Times - Syri.net