A do ta ndryshojë botën kjo e qeshur?

Nga Peter Tiede, BILD

Filloi përzemërsisht, njësoj si të premten, kur presidenti amerikan Trump, duartrokiti diktatorin rus Putin në Alaskë.

Për samitin e paqes në Shtëpinë e Bardhë, Presidenti i Ukrainës Zelensky erdhi pa kravatë, por me xhaketë (të zezë). Trump nuk u ankua, përkundrazi, pati të qeshura, lavdërime, përkëdhelje – imazhe që do mbeten dhe që japin shpresë.

Po, pas 3.5 vitesh lufte, tani po flitet dhe po negociohet.

Takimi i nivelit të lartë mes Trump dhe Zelensky-t nisi në mënyrë demonstrativisht të qetë. Por ishte një valle mbi vezë të paziera!

Në Zyrën Ovale: pa përplasje – shumë lavdërime. Trump dhe ekipi i tij e kishin turpëruar publikisht ukrainasin në përplasjen e fundit fjalë për fjalë.

Por të hënën ishte ndryshe: Të dyja palët u përpoqën të mos e lejonin situatën të përshkallëzohej. Trump foli për një “atmosferë super”, duke e quajtur luftën në Ukrainë – edhe një herë – si luftën e paraardhësit të tij Joe Biden.

Trump i lavdëroi ukrainasit. Zelensky e lavdëroi Trump-in: “Kemi pasur mbështetjen e SHBA-së – edhe nga Presidenti Trump”.

Por më pas Trump lëshoi  pretendimin: “Vladimir Putin do ta përfundojë këtë luftë!”

Çfarë nuk tha ai: Si dëshiron Putini ta përfundojë LUFTËN E TIJ. Domethënë me një fitore të Moskës – në kurriz të Ukrainës.

I pyetur se çfarë do t’u thoshte ukrainasve të rraskapitur nga lufta, që sulmohen çdo ditë, Trump tha: “I dua ukrainasit. Por i dua edhe rusët. I dua të gjithë”. Pa bërë dallim mes popullit agresor dhe atij viktimë.

Dhe Zelensky? Nuk e dha veten. Ka mësuar. Dhe mbetet në pamje të parë i qetë. Por është si të ecësh mbi tel!

Zelensky e bëri të qartë: Ai dëshiron një takim me Putin-in dhe Trump-in. Ai dëshiron një fund të luftës.

Si do të ndodhë kjo: për Trump është vetëm çështje negociatash. Për Zelensky-n, një çështje fitoreje ose disfate.

Një takim treshe, sipas Trump, “nuk është ende i sigurt,” tha ai. Nëse nuk ndodh, “luftimet do të vazhdojnë”. Por nëse ndodh, “ka gjasa të mira që ndoshta të arrihet një fund,” tha presidenti amerikan.

Trump për Putinin: “Ai po pret telefonatën time, sapo të mbarojmë këtu.”

Më vonë, surpriza: Presidenti amerikan ndërpreu bisedimet me evropianët – për t’i telefonuar Putinit ndërkohë…

Pavarësisht gjithë harmonisë dhe mirësjelljes në shkëmbimin me Zelenskyn – një agresivitet latent qëndronte poshtë sipërfaqes. Atmosfera: gjithmonë në rrezik për të marrë për keq.

Zelensky iu përgjigj me shaka një pyetjeje për veshjen e tij — nga i njëjti reporter që herën e kaluar, në dukje në bashkëpunim me ekipin e Trump, e kishte pyetur për zgjedhjet e tij të veshjes. Këtë herë, reporteri Brian Glenn e pyeti për zgjedhjet në Ukrainë. Zelensky tha se në paqe do të mund të mbahen zgjedhje. Pikërisht për këtë është kritikuar; Moska pretendon se ukrainasi nuk është më zyrtarisht në detyrë.

Zelensky falenderoi SHBA-në për “mundësinë për të blerë armë” — por në të njëjtën kohë falenderoi edhe “Evropën”.

Europianët ishin në dhomën pranë: Merz, Macron, Starmer, Meloni e të tjerë duhej të prisnin fillimisht. Pyetja ishte: Çfarë kanë për të ofruar? Shumë prej tyre deri tani kanë qenë mbështetës të vegjël të Ukrainës (Francë, Itali) — por tani duan të përfshihen në diskutime.

Trump i lavdëroi grupin evropian. Dhe përsëriti: “Ne do të arrijmë paqen”.