Ministri i Jashtëm i Italisë, Antonio Tajani, gjatë një videokonference të Këshillit të Punëve të Jashtme të Bashkimit Evropian, ka dënuar ashpër sulmet ndaj gazetarëve në Gaza dhe ka shprehur gatishmërinë e Italisë për të njohur shtetin e Palestinës.

‘Sulmet ndaj gazetarëve janë të papranueshme dhe tregojnë nivelin e dhunës që ka arritur ky konflikt. Duhet t’i jepet fund kësaj lufte dhe të rifillojë procesi politik. Viktimat e pafajshme janë ato që po paguajnë çmimin më të rëndë të këtij konflikti,’ deklaroi Tajani.

Duke iu referuar vrasjes së disa gazetarëve të Al Jazeera-s nga ushtria izraelite, ministri theksoi se kjo situatë është ‘e papranueshme’ dhe paralajmëroi se zgjerimi i operacioneve ushtarake do të rrezikonte jetën e mijëra civilëve të tjerë.

Tajani u shpreh gjithashtu kundër çdo plani për pushtimin e Gazës apo për zhvendosjen masive të popullsisë palestineze: ‘Jemi kundër çdo plani për pushtim të Gazës dhe kundër zhvendosjes masive të palestinezëve. Këtë e kemi deklaruar qartë të premten e kaluar, së bashku me shumë partnerë të BE-së dhe ndërkombëtarë.’

Në vijim të ndërhyrjes së tij, Tajani konfirmoi se Italia është e hapur ndaj njohjes së shtetit palestinez, por nënvizoi nevojën për ndërtimin real të këtij shteti: ‘Jemi të hapur për njohjen e Palestinës, por duhet të punojmë për ndërtimin e një shteti palestinez.’

Ai sqaroi se ‘Bregu Perëndimor dhe Gaza duhet të bashkohen, pa asnjë rol për Hamasin’, dhe se ‘Autoriteti Palestinez është partneri ynë i vetëm.’

Italia, sipas Tajanit, ka paraqitur propozime konkrete dhe operacionale në Konferencën e Nju Jorkut mbi zgjidhjen me dy shtete, ku ka bashkëkryesuar grupin e punës për Sigurinë. Gjithashtu, Italia mbështet plotësisht planin egjiptian për rindërtimin e Gazës, një temë për të cilën Tajani ka pasur disa biseda me homologun egjiptian, Badr Abdelatty.