Japonia lëshon paralajmërime të nivelit të lartë ndërsa përmbytjet dhe rrëshqitjet e dheut godasin Kyushu-n

Shira të rrëmbyeshëm goditën ishullin jugor Kyushu të Japonisë të premten, duke shkaktuar përmbytje të mëdha, rrëshqitje toke dhe paralajmërime urgjente për evakuim. Autoritetet japoneze lëshuan alarmin më të lartë për rrezikun e fatkeqësive natyrore në disa zona të prefekturave Kagoshima dhe Miyazaki.

Në qytetin Aira të Kagoshimës, një rrëshqitje dheu zuri poshtë dy persona, të cilët fatmirësisht u shpëtuan dhe janë aktualisht në spital, sipas Agjencisë së Menaxhimit të Zjarrfikësve dhe Fatkeqësive.

Më shumë se 360,000 banorë janë urdhëruar të evakuohen për shkak të rrezikut të përmbytjeve dhe rrëshqitjeve të mëtejshme të dheut. Pamje televizive treguan lumenj të fryrë, rrugë të përmbytura dhe ujë deri në gju në një qendër tregtare në qytetin Kirishima.

Kaos edhe në transport: shumë linja trenash dhe autobusësh janë pezulluar, ndërsa dhjetëra fluturime janë anuluar.

Agjencia Meteorologjike e Japonisë ka paralajmëruar për shira dhe stuhi të mëtejshme gjatë orëve dhe ditëve në vijim. Autoritetet kërkojnë nga qytetarët që të ndjekin njoftimet zyrtare dhe të ndërmarrin masa paraprake për të garantuar sigurinë personale.