Punëtorët nën valët e të nxehtit: Rreziqet për shëndetin dhe të drejtat që duhet të njihni

Valët intensive të të nxehtit që kanë përfshirë Evropën këtë verë kanë rritur ndjeshëm rrezikun për punëtorët në mbarë kontinentin, veçanërisht ata që punojnë jashtë në kushte të vështira fizike.

Nga fushat bujqësore në Itali, deri në depot industriale të Gjermanisë, temperaturat ekstreme janë bërë një kërcënim serioz për shëndetin dhe jetën e punëtorëve. Stresi nga nxehtësia mund të çojë në lodhje, goditje nga nxehtësia, madje edhe vdekje – ndonjëherë orë apo ditë pas ekspozimit.

Një rast tragjik ndodhi në Barcelonë në fillim të kësaj vere, kur një pastruese rrugësh 51-vjeçare humbi jetën disa orë pasi përfundoi turnin, duke ngjallur shqetësime serioze për mungesën e rregulloreve të standardizuara mbi mbrojtjen nga nxehtësia në Bashkimin Evropian. Ndryshe nga ndotja e ajrit, BE-ja nuk ka legjislacion unik për këtë çështje, duke ia lënë secilit shtet anëtar vendimmarrjen.

Ekspertët e shëndetit publik paralajmërojnë se temperaturat e larta, të kombinuara me lagështinë, rrezatimin diellor dhe mungesën e erës, mund të shkaktojnë dëme serioze, veçanërisht për ata që punojnë fizikisht. Përveç profesionistëve në ndërtim, bujqësi apo shërbime emergjente, në rrezik janë edhe punonjësit në ambiente të mbyllura pa ajrim të mirë. Simptoma si marramendje, dhimbje koke, të përziera apo konfuzion mund të jenë sinjale të hershme të stresit nga nxehtësia, dhe kërkojnë ndërprerje të menjëhershme të punës dhe kujdes mjekësor nëse gjendja nuk përmirësohet.

Sipas Organizatës Ndërkombëtare të Punës, afro 19,000 punëtorë humbasin jetën çdo vit nga pasojat e nxehtësisë ekstreme në vendin e punës. Vetëm në BE, vdekjet e lidhura me të nxehtin në vendin e punës janë rritur me 42% që nga viti 2000.

Disa shtete si Franca, Italia, Spanja apo Greqia kanë marrë masa mbrojtëse si ndalimi i punës gjatë orëve të pikut ose detyrimi i punëdhënësve të ofrojnë ujë të freskët. Por mungesa e rregullave të unifikuara bën që zbatimi të jetë i pabarabartë. Sindikatat evropiane po kërkojnë që BE-ja të miratojë ligje të posaçme që njohin të drejtën për ekzaminime mjekësore dhe refuzimin e punës kur kushtet janë të rrezikshme.

Ekspertët këshillojnë që punëtorët të jenë të vetëdijshëm për të drejtat e tyre dhe të konsultohen me sindikatat ose përfaqësuesit e kompanisë nëse ndihen të rrezikuar. Nëse nuk e dini saktësisht çfarë mbrojtjesh ju ofron ligji, kontrolloni kontratën tuaj të punës dhe mos hezitoni të kërkoni ndihmë profesionale – shëndeti nuk duhet të vihet në rrezik për asnjë orar pune./ Euronews - Syri.Net