Trump përshëndet ndërprerjen e fondeve për organizatat e 'së majtës ekstreme'

Presidenti Donald Trump ka përshëndetur përpjekjet e Shtëpisë së Bardhë dhe të Kongresit për t'i dhënë fund financimeve federale për organizatat e krahut të majtë.

"Presidenti Donald Trump ka bërë më shumë se kushdo tjetër për të eliminuar shpërdorimet, mashtrimet dhe abuzimet në të gjithë qeverinë federale, duke nxjerrë në pah miliarda dollarë që janë shpërndarë nga burokratë të paemëruar dhe që nuk përputhen me atë për të cilën kanë votuar amerikanët. Falë këtij presidenti, amerikanët më në fund kanë transparencë për mënyrën sesi shpenzohen taksat e tyre, dhe është rikthyer llogaridhënia për të ndalur çeqet e bardha për prioritetet e së majtës ekstreme," tha Shtëpia e Bardhë për The Daily Signal.

Departamenti i Shtetit gjithashtu konfirmoi për The Daily Signal se grantet e USAID-it për dy organizata, New Venture Fund dhe The Tides Foundation, janë anuluar.

"Po, mund të konfirmojmë që të dy grantet janë anuluar," tha një zyrtar i lartë i Departamentit të Shtetit për The Daily Signal të martën. "Kjo është një tjetër provë që kompleksi industrial i ndihmës së jashtme amerikane kishte nevojë të dëshpëruar për një rishikim."

Në vend që të çonte para interesat tona kombëtare e të ndihmonte qytetarët tanë, USAID-i ishte kapur nga radikalë që shpërdoronin para dhe burime për projekte progresiste të pavlera. Nën drejtimin e këtij presidenti, me mbështetjen e mandatit nga populli amerikan, Sekretari i Shtetit Marco Rubio ndërmori hapa historikë për ta zhdukur këtë kulturë gërryese dhe të shpërdorimit.

Kjo festë vjen në një kohë kur ligjvënësit në Kapitol po akuzojnë organizata jofitimprurëse të krahut të majtë për keqpërdorim të parave të taksapaguesve gjatë një seance dëgjimore të Komisionit të Drejtësisë. Seanca, që zgjati gati dy orë, u përqendrua në pretendimet se fondet federale po përdoren për të mbështetur projekte jashtë vendit, si një libër komik për personazhe transgjinorë në Peru dhe miliona dollarë për programin Sesame Street në Irak.

Përfaqësuesi Jim Jordan, republikan nga Ohio, tha: "Thënë thjesht, ata e përdorën paranë tuaj kundër jush, morën taksat tuaja dhe i shpenzuan për budallallëqe." Ai pretendoi se miliarda dollarë të taksapaguesve po shkonin për të financuar nisma për diversitet, barazi dhe përfshirje, politika të kufijve të hapur dhe organizata të majta si Southern Poverty Law Center.

Përfaqësuesi Jeff Van Drew, republikan nga New Jersey, kritikoi financimin e një libri komik transgjinor në Peru, duke thënë: "Se ne s'kemi nevoja në vendin tonë, apo jo? Ne paskemi para për të financuar një libër komik transgjinor në Peru."

Van Drew akuzoi miliarderin George Soros se po përdor para të taksapaguesve për të financuar kauza progresiste përmes OJF-ve dhe bëri thirrje për transparencë dhe llogaridhënie, duke e paraqitur debatin si një betejë për kontrollin mes miliarderëve dhe amerikanëve të zakonshëm.

George Soros dhe organizata e tij, Open Society Foundations, kanë reaguar ndaj akuzave.

"Open Society Foundations, e themeluar nga George Soros, është financuesi privat më i madh në botë i grupeve të pavarura që punojnë për të drejtat, barazinë dhe drejtësinë. Ne jemi një fondacion bamirës jopartiak që mbështet një gamë të gjerë OJF-sh që punojnë për të forcuar demokracinë amerikane, për të zgjeruar mundësitë ekonomike dhe për të avancuar të drejtat dhe liritë e garantuara nga Kushtetuta," tha një zëdhënës i Open Society Foundations.

Republikanët e përshkruan situatën si një "kartel jofitimprurës", duke pretenduar se grantet federale po shpërndahen me pak mbikëqyrje për të promovuar një agjendë radikale. Ata paralajmëruan se disa fonde po përdoren madje edhe për të ndikuar në qeveritë e huaja, si në rastin e Hungarisë. Mike Gonzalez nga The Heritage Foundation tha: "Qëllimi ishte të bëhej ndërrim regjimi në një aleat të NATO-s, dhe një aleat shumë i rëndësishëm, dhe kjo është e pajustifikueshme."

Demokratët, nga ana tjetër, e hodhën poshtë seancën si teatër politik që synon të forcojë projektin politik të Trump-it për vitin 2025. Kongresistja Jasmine Crockett, demokrate nga Teksasi, tha: "Kjo nuk ka të bëjë me llogaridhënien, por me heshtjen e organizatave që sfidojnë pushtetin republikan." Ajo mbrojti ndihmën e jashtme si një mjet për mbrojtjen e sigurisë kombëtare dhe kritikoi republikanët për shkurtimin e fondeve për viktimat.

Kongresisti Jamie Raskin, demokrat nga Maryland-i, vuri në dyshim qëllimin e seancës, duke sugjeruar se i mungonte një qëllim i qartë apo prova për keqbërje. Ai kërkoi në vend të kësaj publikimin e dosjeve të Epstein-it, duke thënë: "Pse nuk mbajmë një seancë për fshehjen e vazhdueshme të informacioneve në dosjet e Epstein-it?"

Dëshmitarët republikanë kërkuan më shumë transparencë, auditime dhe një ndalim të fondeve federale për grupet lobuese. Ndërkohë, dëshmitari i demokratëve bëri thirrje për rikthimin e financimit të USAID-it dhe për publikimin e dosjeve të Jeffrey Epstein-it. / NBC Montana - Syri.net