Raport i zymtë për BE-në: Varfëria godet më shumë gratë, të rinjtë dhe të huajt

Të dhënat e fundit nga Eurostat zbulojnë një pamje shqetësuese për sa i përket varfërisë në Bashkimin Evropian: mbi një në pesë qytetarë ishin në rrezik varfërie ose përjashtimi social gjatë vitit 2024, me të paktën 11 vende që kanë parë një rritje të ndjeshme në tre vitet e fundit. Sipas ekspertëve, pavarësisht një rënieje të lehtë prej 0.4 pikësh përqindjeje krahasuar me 2023, situata mbetet kritike dhe larg përmirësimit të vërtetë.

“Rënia është statistikore, por realiteti tregon më shumë njerëz në rrugë dhe radhë për ndihma,” paralajmëroi Rrjeti Evropian Kundër Varfërisë (EAPN). Grupet më të prekura rezultojnë të jenë gratë, të rinjtë e moshës 18–24 vjeç, personat me nivel të ulët arsimor dhe të papunët. Në Qipro, për shembull, 18.5% e grave u gjetën në rrezik varfërie krahasuar me 15.6% të burrave.

Sipas statistikave, Bullgaria (30.3%), Rumania (27.9%) dhe Greqia (26.9%) raportuan përqindjet më të larta të rrezikut, ndërsa Holanda, Qiproja dhe Sllovenia shënuan nivelet më të ulëta. Në Francë, shkalla e varfërisë arriti nivelin më të lartë që nga viti 1996, duke u rritur nga 14.4% në 15.4%, me ndikim më të madh te familjet me një prind të vetëm dhe fëmijët.

Familjet me fëmijë janë gjithashtu në rrezik më të madh. Në Bullgari, 30.8% e tyre janë të ekspozuara ndaj varfërisë, të ndjekura nga Rumania (30.4%) dhe Spanja (30.2%). Edhe familjet pa fëmijë nuk janë të paprekura: në Letoni, 32.3% e tyre ishin në rrezik në vitin 2024.

Në Itali, rreziku ndryshon në varësi të kombësisë. Më shumë se 30% e familjeve me të paktën një anëtar të huaj ishin të ekspozuara ndaj varfërisë, krahasuar me vetëm 6.3% të familjeve italiane. Sipas EAPN, këto të dhëna tregojnë pabarazitë sistemike që prekin kategoritë më të brishta të shoqërisë.

“Gratë mbajnë ende barrën e papaguar të kujdesit dhe të rinjtë përballen me vështirësi për punë dhe strehim të qëndrueshëm,” përfundon deklarata e rrjetit evropian./ Euronews - Syri.net