Dushanbe - Sulmi terrorist në sallën e koncerteve Crocus në Moskë është bërë tema më e diskutuar e ditëve të fundit. Doli se autorët e sulmit terrorist ishin emigrantë nga Taxhikistani. Presidenti i Taxhikistanit Emomali Rahmon foli për këtë ngjarje tragjike në një bisedë telefonike me homologun e tij rus Putin si edhe në një fjalim gjatë një feste fetare më 25 mars.

Më 24 mars, Emomali Rahmon pati një bisedë telefonike me presidentin rus Vladimir Putin, duke dënuar ashpër sulmin terrorist në rajonin e Moskës dhe theksoi se terroristët nuk kanë kombësi. Biseda u zhvillua me iniciativën e palës taxhike: "Terroristët nuk kanë atdhe, komb dhe fe", tha Rakhmon veçanërisht në bisedën e tij me Putinin, siç raportuan mediat vendase.

Presidenti i Taxhikistanit i tha Putinit se të gjithë taxhikët u shprehin dhimbjen rusëve për shkak të incidentit të tmerrshëm. Gjatë bisedës palët ranë dakord për luftën e përbashkët kundër terrorizmit dhe radikalizmit fetar.

Ndërsa, kur foli në manifestimet e "Karvanit të Gëzimit" të mbajtur në Taxhikistan me rastin e një feste fetare, Rahman foli edhe një herë për sulmin terrorist në Moskë dhe theksoi se prindërit duhet të kenë kujdes në edukimin e fëmijëve të tyre.

“Ngjarjet e tmerrshme që u kryen në mënyrë frikacake pranë Moskës na nxisin të gjithë ne, veçanërisht prindërit, t'i kushtojmë vëmendje edukimit të fëmijëve. Ne duhet t'i mbrojmë fëmijët tanë nga përfshirja në grupe të tilla shkatërruese. Ata duhet të mbrojnë nderin e shtetit sovran të taxhikëve, të prindërve të tyre dhe të kombit Taxhik”, citohet në faqen zyrtare të Presidentit të Taxhikistanit të ketë thënë Rahmon.

Masakra në Moskë: Hetuesit rusë marrin në pyetje familjet e të arrestuarve në Taxhikistan

Hetuesit rusë shkuan në Taxhikistan të martën, për të marrë në pyetje familjet e katër burrave të akuzuar për kryerjen e një sulmi vdekjeprurës në një sallë koncertesh pranë Moskës, thanë tre burime të sigurisë taxhikistaneze për Reuters.

Burimet, të cilët nuk ishin të autorizuara për të bërë komente publikisht, thanë se zyrtarët e sigurisë së Taxhikistanit i kishin sjellë familjet në kryeqytetin e këtij vendi, në Dushanbe, nga qytetet Vakhdat dhe Gissar dhe nga distrikti Rudaki.

Presidenti i Taxhikistanit Emomali Rakhmon po e mbikëqyrte personalisht hetimin nga pala taxhike, thanë burimet.

Të hënën, duke bërë komentin e tij të parë publik mbi sulmin e së premtes, presidenti Rahmon e quajti sulmin një "ngjarje të turpshme dhe të tmerrshme" dhe u kërkoi taxhikëve të mbronin fëmijët e tyre nga ndikimet e dëmshme.

Katër burra me origjinë nga Taxhikistani janë vënë në paraburgim me akuzën e terrorizmit, me dyshimin se janë ata që e kanë kryer sulmin. Tre të tjerë, gjithashtu me origjinë nga Taxhikistani, janë arrestuar me dyshimin për bashkëpunim.

Shteti Islamik ka thënë se është përgjegjës për sulmin dhe ka publikuar pamje me video që thuhet se tregojnë masakrën. Grupi nuk ka identifikuar asnjë nga sulmuesit.

Në fillim të këtij muaji, presidenti Rakhmon tha se qeveria e tij ishte e alarmuar nga aktiviteti i predikuesve radikalë islamikë, të cilët po "shplajnë trurin" të rinjve taxhikë, duke i bërë ata të ndjeshëm ndaj manipulimit nga grupet e huaja dhe agjencitë e inteligjencës.

Ish-republika sovjetike prej 10 milionë banorësh është një aleate e ngushtë e Moskës dhe ka një bazë ushtarake ruse; ekonomia e saj varet shumë nga dërgesat e parave nga më shumë se një milion punëtorë migrantë taxhikë që punojnë në Rusi.

Sipas autoriteteve ruse, të paktën dy nga të dyshuarit kanë pranuar se kanë marrë pjesë në sulm.

Masakra ka përforcuar ndjesitë kundër emigrantëve në Rusi, ndërsa videot që dukej se tregonin të dyshuarit duke u torturuar shkaktuan një reagim të ndarë.

Komisioneri rus për të drejtat e njeriut e ka quajtur të papranueshme përdorimin e torturës kundër të burgosurve. Autoritetet ruse kanë thënë se po hetojnë.