Gjenevë  – Lëkura vegjetale dhe çeliku inox i ricikluar i shkrirë në një furrë diellore janë ndër materialet që një markë orësh në Gjenevë po përdor në përpjekjen e saj për të prodhuar ora luksoze të përdorshme.

Firma e vogël ID Geneve nisi në vitin 2020, duke u zotuar të prodhojë ora të nivelit të lartë me një qasje prodhimi miqësore ndaj klimës dhe mjedisit duke përdorur materiale jo tradicionale.

“Nuk bëhet fjalë që të përdoren kuti të bëra nga dru amazonianë, që do të lihen për të mbledhur pluhur në një dollap”, tha për AFP, Nicolas Freudiger, bashkëthemeluesi 35-vjeçar i kompanisë.

Në vend të kësaj, 620 orët që kompania ka prodhuar deri më tani janë paraqitur në paketim të bërë nga algat, të cilat mund të treten në ujë dhe të përdoren si pleh kopshti.

ID Geneve, e cila i shet orët nga 3,600 deri në 5,000 franga zvicerane copën (ose 4200-5800 dollarë), tashmë ka bërë bujë në botën e prodhimit të orës zvicerane.

Dhe zhurma është rritur më shumë që kur aktori amerikan Leonardo DiCaprio hyri si investitor tetorin e kaluar.

Freudiger, një i diplomuar në Shkollën e Biznesit të Hotelerisë së Lozanës, i cili më parë ka punuar në Coca-Cola, erdhi me idenë për të bërë një markë të qëndrueshme ore luksoze pasi ndoqi një seminar rreth ekonomisë.

'Alternativë e besueshme luksi'

Ai e diskutoi atë me mikun e fëmijërisë Cedric Mulhauser, një orëndreqës i trajnuar në markën prestigjioze Vacheron Constantin dhe një mik stilisti, Singal Depery Moesch.

Të tre vendosën të krijojnë "një alternativë të besueshme luksi", tha Freudiger.

Për modelin e tyre të parë, Circular 1, ata përdorën çelik inox të ricikluar nga copat e mbetura nga prodhimi i orëve dhe materialeve mjekësore në rajonin Jura të Zvicrës.

Ata morën gjithashtu ora të pashitura të markave më të mëdha, të cilat ishin të destinuara për shkatërrim, për t’u marrë përbërësit.

Dhe për rripat delikat të kyçit të dorës, ata iu drejtuan pjesërisht një kompanie italiane që përdor marcën e rrushit -- mbetjen e ngurtë të mbetur pas shtypjes -- dhe gjithashtu një kompanie britanike fillestare që bën lëkurë vegjetale nga mbeturinat e gjelbra të mbledhura në parqet e Londrës.

Treshja shkoi gjithashtu në malet franceze të Pirenejve për të testuar një furrë diellore, duke u kthyer me shufra çeliku të ricikluar, të shkrirë pa përdorur lëndë djegëse fosile.

Ata së shpejti shpresojnë ta zhvendosin atë pjesë të prodhimit në Zvicër, mes planeve për një furrë të re diellore në qytetin veriperëndimor të La Chaux-de-Fonds në malet Jura.