Aktori i njohur izraelit Idan Amedi, është plagosur rëndë gjatë luftimeve në Rripin e Gazës, sipas familjes së tij dhe spitalit ku po trajtohet.

Amedi, me origjinë kurde ishte një nga yjet e hitit të serialit Netflix Fauda, ​​në të cilin luan rolin e një oficeri të njësisë së forcave speciale në ushtrinë izraelite.

Amedi është në gjendje kritike në ICU në Qendrën Mjekësore Sheba Tel Hashomer, në Izraelin qendror, tha një zëdhënës i objektit.

“Nuk ka asnjë rrezik për jetën e tij” mësohet të ketë thënë babai i tij sipas faqes izraelite ëalla!. 

Pak para se të plagosej, Amedi foli për një kanal televiziv izraelit për luftën në Gaza.

“Është çmenduri, çfarë ndërtuan ata (Hamasi) këtu”, tha ai për Channel 12. “Operacioni këtu është në një rrugë shumë qendrore (tuneli i Hamasit). Këtu kemi gjetur kilometra tunele, armatim, madje edhe armatim special. Ne kemi qenë të zënë dy ditët e fundit duke u përpjekur ta shkatërrojmë atë.”

 Të hënën, nëntë ushtarë izraelitë u vranë në Gaza qendrore dhe jugore, në një nga ditët më vdekjeprurëse për forcat izraelite që nga fillimi i ofensivës ushtarake të Izraelit në enklavë, thanë Forcat Mbrojtëse të Izraelit (IDF).

Sipas numërimit zyrtar, 185 ushtarë të IDF janë vrarë në luftime në Gaza që nga 7 tetori.