Shefi i Politikës së Jashtme të BE, Josep Borrell, ka folur për luftën Izrael-Hamas dhe se si të punohet për paqen në Lindjen e Mesme pasi të përfundojë konflikti aktual.

Duke folur në Barcelonë më herët, kryediplomati i BE-së bëri thirrje që Izraeli të mos "e rikolonizojë" Gazën, duke thënë se palestinezët dhe izraelitët kishin një "të drejtë të barabartë dhe legjitime për të njëjtën tokë", raporton Reuters.

Ai shtoi se një shtet palestinez në Bregun Perëndimor, Jerusalemin Lindor dhe në Gaza ishte "garancia më e mirë" për "sigurinë dhe paqen e Izraelit", sipas BBC.

Shefi i Punëve të Jashtme të BE-së bën thirrje për zgjatje të përkohshme të armëpushimit

Josep Borrell ka bërë thirrje për zgjatjen e armëpushimit të përkohshëm në Gaza. Sipas kushteve fillestare të marrëveshjes, pauza e përkohshme e luftimeve është në ditën e fundit. Por, ka tregues të hershëm që mund të zgjatet.

"Pauza duhet të zgjatet për ta bërë atë të qëndrueshme dhe afatgjatë ndërsa punohet për një zgjidhje politike," tha ai në një takim të Unionit për Mesdheun në Barcelonë.

Më 27 nëntor, Përfaqësuesi i Lartë i BE, Josep Borrell dhe Komisioneri për Menaxhimin e Krizave, Janez Lenarčič shkuan në Barcelonë të Spanjës për të marrë pjesë në Forumin e 8-të Rajonal të Unionit për Mesdheun (UfM).

Takimi këtë vit shënon 15 vjetorin e UfM dhe zhvillohet në sfondin e luftës së Izraelit kundër Hamasit dhe situatës së rëndë në Palestinë. Ai mbledh mbi 30 pjesëmarrës në nivel ministror të rajonit euro-mesdhetar, të cilët do të diskutojnë këtë krizë.

Në mëngjes, ndërmjet orës 9:30 dhe 13:00, Përfaqësuesi i Lartë do ta bashkëkryesojë Forumin me Ayman Safadi, Zv.kryeministër dhe Ministër i Punëve të Jashtme dhe për Emigrantët i Jordanisë.

Forumi Rajonal i UfM-së organizohet nga José Manuel Albares, Ministër i Punëve të Jashtme dhe Bashkëpunimit të Spanjës dhe Nasser Kamel, Sekretari i Përgjithshëm i Unionit për Mesdheun.

Komisioneri për Menaxhimin e Krizave Janez Lenarçiç do të përfaqësojë Komisionin e BE-së.

Princi Faisal bin Farhan, Ministri i Jashtëm i Mbretërisë së Arabisë Saudite, do të marrë pjesë gjithashtu duke përfaqësuar Komitetin Ministror Arabo-Islamik.

Borrell, pas fjalës hyrëse në orën 9:30, do të mbajë një konferencë për shtyp me bashkëkryesuesin dhe nikoqirët në orën 13:00 CET.

Pas misionit të tij të fundit në rajon, Forumi do të jetë një rast i rëndësishëm për Përfaqësuesin e Lartë që të shkëmbejë me përfaqësuesit e 43 vendeve anëtare të UfM-së mbi të gjitha aspektet e situatës  rreth Gazës dhe të diskutojë rrugën për të ecur përpara.

Bashkimi Evropian është dhe do të mbetet aktivisht i angazhuar me të gjithë partnerët e tij për të punuar drejt ringjalljes së një procesi politik mbi bazën e zgjidhjes me dy shtete.