Qeveria e Viktor Orban ka nisur një "konsultim kombëtar" të ri duke u kërkuar votuesve mendimet e tyre për çështje thellësisht përçarëse si migrimi, të drejtat e LGBT dhe mbështetja për Ukrainën – me shumë nga pyetjet që drejtohen qartë kundër BE-së, shkruan Euronews.
Qeveria populiste e krahut të djathtë të Hungarisë nxori një pyetësor jozyrtar për qytetarët e saj duke kërkuar opinionet e tyre për një sërë çështjesh përçarëse që shihen gjerësisht si kundër BE-së, duke përfshirë migrimin, të drejtat e LGBdhe mbështetjen për Ukrainën.
Mes gjithsej 11 pyetjeve, qeveria e kryeministrit Viktor Orbán po pyet votuesit hungarezë nëse ata do të mbështesin një propozim për të bllokuar paketën e ndihmës katërvjeçare prej 50 miliardë eurosh të BE-së për Ukrainën, nëse blloku nuk i çliron miliarda euro fonde të ngrira për Hungarinë.
BE-ja i bllokoi më parë këto fonde për shkak të shqetësimeve se Orbán po dështonte në respektimin e standardeve të sundimit të ligjit dhe të drejtave të njeriut në Hungari. Kryeministri hungarez nga ana e tij ka akuzuar BE-në se po përpiqet të imponojë politika ndaj vendit.
Hungaria ka refuzuar të furnizojë Kievin me armë që nga fillimi i pushtimit rus dhe ka kundërshtuar sanksionet e BE-së kundër Moskës. Vendi ka kundërshtuar gjithashtu ambiciet e Ukrainës për t'u bashkuar me BE.
“Ata po i kërkojnë Hungarisë mbështetje plus (për Ukrainën) edhe pse vendi ynë nuk ka marrë fondet e BE-së për këtë shkak ”, thuhet në një pjesë të pyetësorit, të cilin qeveria hungareze e quajti një “konsultim kombëtar”.
Një nga përgjigjet e mundshme sugjeronte këtë: "Ne nuk duhet të paguajmë më shumë për të mbështetur Ukrainën derisa të marrim paratë që na detyrohen".
Kjo nuk është hera e parë që qeveria e Orbanit ka nisur një pyetësor, sondazh të ngjashëm për qytetarët e vendit që kur ai mori pushtetin në vitin 2010.
Sondazhet janë kritikuar më parë si mjete propaganduese manipuluese që inkurajojnë votuesit të zgjedhin përgjigjet e preferuara të qeverisë - të cilat shpesh marrin një qëndrim luftarak kundër BE-së./ar.sh/SYRI.NET
© SYRI.net