Agjencia e OKB-së për refugjatët palestinezë, UNRWA, thotë se depoja e karburantit që ka përdorur për furnizime është tharë.

Drejtoresha e saj e komunikimit, Juliet Touma, i tha BBC-së se kjo do të vërë në rrezik operacionin më të madh humanitar në Rripin e Gazës.

Ajo thotë se kjo do të thotë që UNRWA nuk do të jetë në gjendje të marrë ndihmat e sjella në territor me kamionë nga Egjipti nesër në mëngjes.

''Ne nuk do të jemi në gjendje t'i ngasim makinat tona dhe të dërgojmë miell në furra buke, nuk do të jemi në gjendje t'u japim karburant objekteve mjekësore - ne e bëmë këtë sot, ky ishte 'vrapimi i fundit'. Kemi 780,000 njerëz të strehuar me ne - nuk do të jemi në gjendje t'u shërbejmë atyre." është shprehur Touma.

Ajo shton gjithashtu se UNRWA ka përdorur karburant nga sektori privat dhe gjithashtu ka marrë karburant nga një depo në "koordinim të ngushtë" me autoritetet izraelite, por "edhe kjo tani ka mbaruar".

E pyetur për mekanizmat që SHBA-ja ka përmendur për rifurnizimin e karburantit, ajo thjesht thotë: "Ne kemi nevojë për karburant tani, tani".