Kjo histori përmban disa detaje shqetësuese, njofton BBC.

Dr Mohamed Abu Selmia, menaxher i spitalit qendror Al-Shifa, i ka thënë BBC-së se 32 persona kanë vdekur ditët e fundit.

Tre foshnja të parakohshme dhe shtatë persona kishin vdekur për shkak të mungesës së oksigjenit, tha ai.

Disa pacientë të tjerë që kanë nevojë për dializë rrezikojnë të vdesin në "dy ditët e ardhshme" pasi trajtimi nuk është më i disponueshëm, tha ai.

Spitali është pothuajse pa karburant dhe burime të tjera për të vazhduar funksionimin - dhe foshnjat e lindura parakohe janë nxjerrë nga inkubatorët sepse nuk funksionojnë më. 

Aty janë edhe më shumë se 600 pacientë të plagosur.

BBC e pyeti doktorin nëse ushtria izraelite kishte bërë ndonjë kontakt në lidhje me evakuimin e pacientëve apo foshnjave të lindura para kohe, pasi Izraeli ka thënë se ka dërguar karburant pranë spitalit dhe burimeve të tjera.

Por doktori tha: “Jo, ata nuk kanë kontaktuar, përkundrazi ne iu drejtuam atyre... por deri më tani nuk kemi marrë asnjë përgjigje.

"Ka negociata për evakuimin e foshnjave të lindura para kohe, por deri më tani asgjë nuk ka ndodhur."

Abu Selmia tha se spitali kishte qenë gjithashtu në kontakt me Kryqin e Kuq për të tentuar dhe koordinuar varrimin e trupave, nga të cilët ishin rreth 150 në spital - por iu tha se aktualisht nuk ishte e mundur.

Ai shtoi – dhe ky është një detaj që disa lexuesve mund t'u duket shqetësues - se qentë kishin nisur të  hanin kufomat./ar.sh/SYRI.NET