Shtetet anëtare të BE-së dhe Parlamenti arritën marrëveshjen për rregulla të reja për të rikthyer dhe ruajtur habitatet e degraduara në BE. Vendet anëtare duhet të rikuperojnë të paktën 30% të zonave të habitateve të mbuluara nga ligji i ri deri në vitin 2030, 60% deri në vitin 2040 dhe 90% deri në vitin 2050.

Parlamenti Evropian dhe Shtetet Anëtare të Bashkimit Evropian (BE) arritën një marrëveshje të enjten mbi një pjesë kyçe të legjislacionit për restaurimin e natyrës dhe biodiversitetin, i cili kishte ngecur mbi çështjen e bujqësisë në veçanti, njofton euronews.

Marrëveshja do t'u kërkojë shteteve anëtare të zbatojnë masa për të rikthyer natyrën në të paktën 20% të zonave tokësore dhe detare të Unionit deri në vitin 2030, sipas një deklarate nga Këshilli Evropian, i cili përfaqëson 27 vendet anëtare.

Ligjvënësit evropianë e mirëpritën marrëveshjen e arritur para mesnatës pas disa orë diskutimesh që filluan të enjten pasdite, por kritikët e drejtuan gishtin te elementët që ishin zbutur.

“Ne mund të jemi krenarë për këtë rezultat historik, i cili përcakton rregulla që janë ambicioze dhe praktike për të gjithë”, deklaroi Pascal Canfin, kreu i komisionit të mjedisit të Parlamentit, në rrjetin X.

Ministrja e Tranzicionit Ekologjik të Spanjës, Teresa Ribera Rodriguez, tha se ishte "krenare" për ligjin, "i pari i këtij lloji".

“Do të na ndihmojë të rindërtojmë nivele të shëndetshme të biodiversitetit dhe të ruajmë natyrën për brezat e ardhshëm, duke luftuar ndryshimet klimatike”, tha ajo.

Komisioni Evropian e kishte propozuar tekstin në vitin 2022. Partia më e madhe në Parlamentin Evropian, Partia Popullore Evropiane (EPP) e krahut të djathtë, u përpoq ta braktiste më herët në vitin 2023./ar.sh/SYRI.NET

​