Grupi tha se Shell pranoi ta zvogëlonte kërkesën e saj për dëmshpërblim në 1,3 milionë euro në qoftë se aktivistët e Greenpeace pranojnë të mos protestojnë më kundër asnjërës prej infrastrukturave të naftës dhe gazit të Shell, në det ose në porte.

Kompania Shell ka paditur “Greenpeace” duke kërkuar 2 milionë euro dëmshpërblim pasi aktivistët hipën në anijen e prodhimit të naftës të kompanisë në det këtë vit.

Kompania britanike, lidere e naftës dhe e gazit e paraqiti padinë kundër grupit mjedisor në Gjykatën e Lartë të Londrës.

Aktivistët e Greenpeace hipën në anije në janar pranë Ishujve Kanarie në brigjet e Atlantikut të Afrikës veriore. Ata udhëtuan me të deri në Norvegji në shenjë proteste për shpimin e naftës.

Në një email për agjencinë e lajmeve Reuters, Shell konfirmoi se po zhvilloheshin procedura ligjore kur u pyet nëse po e pasdite Greenpeace për incidentin, por nuk pranoi të komentonte mbi shumat e pretendimeve.

Ngjitja në një anije në det që ishte në lëvizje ishte "e paligjshme dhe jashtëzakonisht e rrezikshme", tha një zëdhënës i Shell.

"E drejta për të protestuar është themelore dhe ne e respektojmë atë absolutisht. Por ajo duhet të bëhet në mënyrë të sigurt dhe të ligjshme," shtuan ata.

Si hipën aktivistët e Greenpeace në një anije nafte?

Anija ishte e destinuar për në fushën e naftës dhe gazit Penguins në detin e Veriut, e cila nuk është ende në prodhim.

Katër aktivistë të Greenpeace përdorën litarë për t'u ngjitur në anije nga varkat me fryrje që e ndoqën anijen me shpejtësi të madhe.

Protestat në det kundër infrastrukturës së naftës, gazit apo minierave kanë qenë prej kohësh pjesë e operacioneve të Greenpeace.

Pretendimi është një nga 'kërcënimet më të mëdha ligjore' kundër Greenpeace

Dëmet që Shell kërkon përfshijnë kostot që lidhen me vonesat e transportit dhe shpenzimet për siguri shtesë, si dhe kostot ligjore, sipas një dokumenti të parë nga Reuters.

"Kërkesa është një nga kërcënimet më të mëdha ligjore kundër aftësisë së rrjetit Greenpeace për të bërë fushatë në historinë më shumë se 50-vjeçare të organizatës," tha Greenpeace në një deklaratë.

Grupi tha se Shell ofroi të zvogëlonte kërkesën e saj për dëme në 1.3 milionë euro nëse aktivistët e Greenpeace pranojnë të mos protestojnë më kundër asnjë prej infrastrukturës së naftës dhe gazit të Shell në det ose në port.

Greenpeace tha se do ta bënte këtë vetëm nëse Shell zbatonte një urdhër të gjykatës holandeze të vitit 2021 për të ulur emetimet e saj me 45 për qind deri në vitin 2030, të cilin Shell e ka apeluar.

​