Aktori Matthew Perry, i cili u nda nga jeta të shtunën e kaluar në moshën 54-vjeçare, u varros në Los Anxhelos të premten pasdite (koha lokale). Aktorët e “Friends” ishin të gjithë aty për t’i dhënë lamtumirën, siç raportojnë mediat amerikane që kanë publikuar pamjet përkatëse nga ceremonia.

Të afërmit dhe miqtë u mblodhën në varrezat, rreth një kilometër nga studiot e Warner Brothers, ku u filmuan episodet e serialit të njohur televiziv. Shumë yje të Hollivudit si Elizabeth Taylor, Michael Jackson dhe Lucille Ball janë varrosur në të njëjtat varreza.

Matthew Perry, i cili u identifikua me rolin e Chandler Bing në 10 sezonet (1994-2004) që transmetoi serialin “Friends”, u gjet i vdekur në shtëpinë e tij në Los Angeles, duke përhapur pikëllimin në Hollywood dhe miliona fansa të tij në mbarë botën.

Faqja e internetit TMZ dhe edicioni online i gazetës New York Post Page Six publikuan foto të bëra nga një distancë e largët, në të cilat shihen të pranishmit e funeralit. Të gjithë yjet e Matthew Perry në “Friends” – Jennifer Aniston, Courteney Cox, Lisa Kudrow, Matt LeBlanc dhe David Schwimmer – ishin aty, raporton TMZ. Në artikullin e Page Six, thuhet se babai i aktorit, John Bennett Perry, dhe njerku i tij, Keith Morrison, morën pjesë në funeralin.

Detajet mbi shkaqet e vdekjes së aktorit 54-vjeçar priten të zbardhen nga ekspertiza e Kërkimit të Qarkut në Los Angeles, pas përfundimit të autopsisë dhe analizave toksikologjike.

Matthew Perry ka vdekur një vit pas publikimit të librit të tij Friends, Lovers, and the Big Terrible Thing, në të cilin ai tregoi betejën e tij shumëvjeçare për t’u çliruar nga droga dhe alkooli.

Të premten u krijua fondacioni që mban emrin e tij (The Matthew Perry Foundation), i cili do të nderojë kujtimin e tij duke ndihmuar njerëzit që po luftojnë për të kapërcyer varësinë e tyre.