Të shtunën në mëngjes, kufiri i Rafahut u hap për një kohë të shkurtër për të lejuar 20 kamionë ndihma të kalojnë në Rripin e Gazës nga Egjipti. Ndërsa shumë e kanë mirëpritur rihapjen e shkurtër, grupet e të drejtave theksojnë se nevojitet më shumë ndihmë brenda enklavës së rrethuar.

Drejtori i Përgjithshëm i Organizatës Botërore të Shëndetësisë Tedros Adhanom Ghebreyesus ishte një nga ata që paralajmëroi të shtunën se "nevojat janë shumë më të mëdha".

Tedros në një postim në rrjetet sociale tha se "për të përmbushur nevojat urgjente shëndetësore të të gjithë njerëzve në Gaza", OBSH po bënte thirrje për kalim të sigurt të autokolonave shtesë të ndihmës nëpër enklavë, për mbrojtje të të gjithë punonjësve humanitarë dhe një akses të vazhdueshëm për ndihmë shëndetësore.

Sipas OBSH-së, furnizimet përfshijnë "furnizime dhe medikamente për traumat për 1200 persona dhe çanta për traumat për stabilizimin në vendngjarje deri në 235 personave të lënduar".

"Ato përfshijnë gjithashtu ilaçe dhe trajtime për sëmundjet kronike për 1500 persona dhe ilaçe bazike dhe furnizime shëndetësore për 300,000 njerëz për tre muaj," tha OBSH.

Organizata tha se po punonte me shoqatat e Gjysmëhënës së Kuqe të Egjiptit dhe Palestinës për të siguruar kalimin e sigurt të furnizimeve dhe dërgimin e tyre në spitale dhe objekte shëndetësore, duke shtuar se spitalet brenda Gazës tashmë kanë arritur "pikën kulminante" për shkak të mungesave.