Presidenti ukrainas Volodymyr Zelensky kërkoi të bënte një vizitë solidariteti në vazhdën e sulmit të Hamasit në Izrael, por iu tha se “koha nuk është e duhur”, raportojnë mediat në gjuhën hebraike.

Ndryshe, Zelensky bëri një deklaratë mbështetëse për Izraelin pas sulmit, duke thënë se “Izraeli kishte një të drejtë të padiskutueshme për t’u mbrojtur nga sulmet nga terroristët palestinezë”.

“Terrori është gjithmonë një krim, jo vetëm kundër një vendi apo viktimave specifike, por kundër njerëzimit në tërësi”, tha ai, shkruajnë mediat e huaja.

“Bota duhet të qëndrojë e bashkuar… në mënyrë që terrori të mos tentojë të marrë apo shkatërrojë jetët kudo dhe në asnjë moment”, tha Zelensky.

Izraeli ka shprehur vazhdimisht mbështetje për Ukrainën që kur forcat ruse pushtuan Ukrainën në shkurt të vitit të kaluar, por nuk ka ofruar ndihmë ushtarake.

Izraeli ka hezituar gjithashtu të “krijojë armiqësi” me Moskën, e cila ka një prani të madhe ushtarake në Siri.