Gati 400 luanë deti dhe foka me gëzof janë gjetur të ngordhur në brigjet e Uruguait javët e fundit, kanë njoftuar autoritetet lokale, duke ia atribuar masakrën gripit të shpendëve.

Që nga zbulimi i një rasti të parë më 5 shtator në një luan deti të bllokuar në plazhin Cerro në Montevideo, Ministria e Blegtorisë, Bujqësisë dhe Peshkimit të Uruguait ka ndjekur nga afër situatën epidemiologjike të këtyre gjitarëve detarë.

Nga 400 kufomat e gjetura në bregdetin jugor të Atlantikut të Uruguait, 350 tashmë janë varrosur për të parandaluar përhapjen e virusit.

“Ne nuk mund ta kontrollojmë këtë sëmundje. Thjesht duhet të presim që imuniteti i kësaj popullate të ketë efekt, por nuk e dimë se kur do të ndodhë”, shpjegon ministria uruguaiane, duke shtuar se autoritetet vazhdojnë kërkimet e tyre për të përcaktuar origjinën e infeksionit. Nuk është gjetur asnjë shpërthim gripi shpendësh te zogjtë e egër apo ata shtëpiakë.

Në Uruguai popullsia totale e luanëve të detit dhe e fokave arrin në 315000 gjitarë. Gripi i shpendëve është një sëmundje që nuk ka shërim apo trajtim. Virusi H5N1 shkakton dëmtime serioze muskulare, neurologjike dhe respiratore.